Txistu doinurik ez da faltako irailean
Hainbat auzotan eskainiko ditu dianak igandero Udal Txistulari Taldeak.
Igandero hutsik egin gabe egiten dute diana txistulariek. Irailean txistu doinuek hartuko dituzte kaleak berriz ere, udako oporraldia amaituta, eta Udal Txistulari Bandak egingo dituen dianen berri eman du. Irailaren 3an izango da lehena, Erdiguneko kaleetan barrena udaletxeko arkupeetatik abiatuta. Batelarien zortzikoak (Pablo Sorozabal Mariezkurrena) eta Estropadetako zortzikoa (Jose Ignacio Ansorena) zortzikoak joko dituzte.
Irailaren 10ean Agustinak auzoan egingo dute diana. Lehenengo igandean joko dituzten zortziko berak eramango dituzte Agustinetako kaleetan, izan ere iraileko lehen bi asteburuetan jokatuko da Kontxako estropada.
Irailaren 17an Fanderia, Gabierrota eta Lartzabal auzoetan egingo du diana taldeak. Ate Txukuna (Vergara) eta Xaxu konfiterua (Jose Ignazio Ansorena Miner) zortzikoak joko dituzte.
Irailaren 24an, azkenik, Alaberga auzoan egingo du diana Udal txistulari Taldeak. Auzo Soñua (Arraras-Turrillas) eta Nere amak baleki (Jose Mari Iparragirre) zortzikoak joko dituzte txistulariek.
Diana guztiak 09:00etan hasiko dira.
