Andra Mari Donostiako Musika Hamabostaldian arituko da
Santanderko Nazioarteko Jaialdiaren itxiera ekitaldian ere arituko dira errenteriarrak.
Emanaldiz jositako uda ez du nolanahi bukatuko Andra Mari Abesbatzak. izan ere , Andoni Sierrak zuzentzen duen taldeak bi emanaldi garrantzitsu izango ditu aste honetan bertan. Die Deutsche Kammerphilharmonie Bremen orkestrarekin ariko da bi hitzordu garrantzitsu horietan Omer Meir Wellber zuzendariaren gidaritzapean. Bi emanaldietan, Joseph Haydnen Missa Hob XXII Nelson obra interpretatuko dute errenteriarrek.
Lehen emanaldia, Santanderren izango du Andra Marik, Santanderko Musika Jaialdiaren itxiera ekitaldian hartuko baitu parte. Ostegunean izango da emanaldia. Ostiralean berriz, Donostian ariko da abesbatza, Musika Hamabostaldiaren barruan.
Bi emanaldietako laukote bakarlaria Heidi Stober sopranoak, Rachel Frenkel mezzosopranoak, Martin Mittzerrutzner tenorrak, eta Stefan Cerny baxuak osatuko dute.
“Erantzukizunez” bizi duela bi emanaldietan parte hartzeko aukera azaldu du Andra Mari abesbatzak, “baita harrotasunez ere”: “Lan zoragarri hau talde bikain honekin partekatzea luxua da”.
