[Argazkiak] Kontxan da Hibaika
Kontxarako txartela lortzea zuten helburu eta ez dute hutsik egin Hibaikakoek. Seigarren sailkatu dira errenteriarrak eta Kontxan lehian ariko dira 11. urtez.
Hibaikako arraunlariak Kontxarako txartela lortu izana ospatzen. Txartela lortzea zuen helburu Hibaikaren eskifaiak, eta bikain aritu dira. Itsasoa eta haizea kontrako izan dute gaur ontzi guztiek, batez ere lehenak atera direnak erlojupekoan. Seigarren sailkatu dira errenteriarrak Kaikuren aurretik, eta beraz, datozen bi asteburuetan Kontxan ariko dira.
Hibaikak 11. urtez hartuko du parte Kontxako hitzordu garrantzitsuan aurtengo ekitaldia aintzat hartuta.
Natalia Tubio aritu da gaurko sailkatze estropadan patroi lanetan. Estropada amaituta, pozik azaldu da, “zaila zegoen arraunerako, baina zentzuz egin dugu arraun eta pozik gaude lortutakoarekin”.
Estropada aurretik mintzatu da Iñaki Mendizabal errenteriarren entrenatzailea. Zaila ikusten zuen gaurko estropada eremua, “zaila dago, oso mugitua, olatua dago. Trainerua gobernatzeko lana izango du patroiak”. Estropada ona egitea zuen helburu Mendizabalek, eta Hibaikako emakumeek erronka fin bete duten zalantzarik ez da Kontxan parte hartzeko txartela irabazita.
Bihar gizonen txanda izango da.
Ondoko galeriako argazkiak, Olaia Gerendiain kazetariak egindakoak dira.
