Estalki berria Fanderiako igerilekuarentzat
Irailaren 11n hasiko ditu lanak udalak eta 20 asteko epea beharko dutela amaitzeko aurreikusi du.
Fanderiako igerilekuko estalki mugikorra. Fanderiako Igerilekuak egun duen estalki mugikorra osorik aldatzea erabaki du Errenteriako Udalak arrisku egoerak saihestu eta instalazioen segurtasuna mantentzeko. Estalki mugikorraren gaineko txostena egin ondoren hartu du erabakia. Hala, jakinarazi duenez, irailaren 11n hasiko ditu lanak estalki hori ordezkatzeko eta berria jarri bitartean 20 aste beharko dituela ere aurreikusi du. Inbertsioa, 700.000 eurokoa izango da.
Irailaren 11n hasi eta 25ean amaituko den instalazioaren urteroko geldialdi teknikoa bukatu ondoren, beraz, kiroldegiak ateak irekiko ditu, baina igerilekua eta hidroterapia eremuak ez dira erabilgarri izango. Bai ordea, gimnasioa, jarduera aretoa, eta padel pistak. horien ordutegia lanegunetan 07:000etatik 22:00etara izango da, larunbatetan 09:00etatik 21:30era eta igande zein jai egunetan, 09:00etatik 14:00etara.
Erabiltzaileei gogorarazi die Galtzaraborda kiroldegia zabalik izango dela ohiko ordutegian igerileku eta muskulazio gela zerbitzuak eskainiz.
Prezio konpentsazioak
Egoeraren harira, erabiltzaileek, zein igeriketako ikasleek kirol instalazioen harreran hainbat aukera eskatu ahalko dituzte. Honakoak:Fanderiako igeriketa ikastaroetan plaza bat ordaindu edo erreserbatu duten ikasleek Galtzarabordan libre dauden plazak kontsultatu eta ikastaroa bertan egitea eska dezakete; plaza erreserba eskatzea igerilekua berriro ireki eta Fanderiako ikastaroak berriz ere hasi arte; erreserba itzultzeko eskatzea plaza galduz.
Abonuak erabiltzeko eszedentzia eska dezakete berriz, hilean behin ordaintzen duten pertsonek, hau da, ordainketak etetea Fanderiako igerilekua berriz ere ireki arte.
Urteko ordainketa egiten duten erabiltzaileek, bai igerilekuan bai ordainketa orokorrekoak, urteko kobrantza luzatzeko eskatu ahalko dute, irailaren 25etik harik eta zerbitzua martxan jarri arte. Bi kasuetan abonatuek ez dute matrikularen zenbatekoa galduko.
Kuotan baja ematea izango da beste aukera. Kasu horretan, urteko ordainketa duten pertsonek kuotaren zati proportzionala itzultzea eska dezakete itxiera egunetik. Baja emanez gero, ez da matrikularen zenbatekoa galduko.
Errenteriako Udalak eskerrak eman dizkie erabiltzaile guztiei “ulerkorrak izateagatik”.
Informazio gehiago jaso nahi dutenek Galtzarabordako kiroldegiko 943 44 96 90 edo Fanderiako kiroldegiko 943 34 44 23 telefono zenbakietara dei dezakete.
