[Argazkiak] Zapirain aita-alaben marmitakoa, gorena
Jabi arrieta eta Mayen de la Fuente bigarren sailkatu dira, eta Karmen Sole Cienfuegos eta Edurne Lasaga hirugarren.
Zapirain aita-alabak, Mikel arruti alkatea, eta Ixkulin elkarteko kide batekin. Luze mantendu dute Ixkulin elkartekoek ikusmina. 12:30erako sua itzalita zuten-eta marmitakoa lehiaketan parte hartu duten hamahiru bikoteek. Epaimahaiak erabakia hartu du, baina ez dute antolatzaileek publiko egin 17:00ak arte. Itxaronaldiak izan du bere saria, txapelketako hiru bikote irabazleentzat, bederen. Bateren bati akaso, kontrako eztarrira joango zitzaion kafea ez duenean bere izena irabazleen artean entzun.
Zalantzarik ez da; guztiek goxo prestatuko zituzten marmitakoak, baina bat izan da gorena. Aurtengo irabazleak Zapiraindarrak izan dira. Aita-alabek, Joxe Antonio eta Miren Zapirainek prestatutako marmitakoa izan da epaimahaiaren arabera sari nagusia merezi zuena aurtengo txapelketan.
Javi Arrieta eta Mayen de la Fuentek bigarren saria lortu dute; eta Karmen Sole Cienfuegos eta Edurne Lasagak, berriz, hirugarrena. Azken horiek, lehen saria eskuratu izan balute gisa ospatu dute hirugarren sari hori, pozarren.
Asko izan dira marmitakoaren bueltara bildu direnak. Eta tartean zen, ezin bestela, Mikel Arruti alkatea ere. Eskerrak eman dizkie Arrutik gaurko herri bazkarian parte hartu duten herritar guztiei, baita Marmitako Lehiaketaren antolatzaile Ixkulin elkarteari ere. Parte hartzaileei ere alkateak esker ona azaldu die, eta txalo bat eskatu guztientzat. Epaileen lana ere hartu du aintzat, ez zuten eta lan erraza izango hamahiru marmitakoen artetik irabazleak aukeratzea.
Berari tokatutakoa “goxoa” zegoela esan du Arrutik, “aitortu behar dut platerkada bat baino gehiago jan dudala. Suposatzen dut batetik baino gehiagotik probatu dudala eta nireak behintzat, goxoak zeuden. Irabazlea edo ez ez dakit, goxoak zeudela bai”.
Orain arratsalde osoa aurretik, baita gaua ere. Herri afaria egingo dute Lope Isasti plazan norberak eramandakoekin, sagardoa udalak jarrita, eta ondoren, kontzertuak Karlos Saldise plazan: Astelehen Goizak, Bengo eta Txiltxoko 23:00etan hasita, eta DJ Iker Gurutze Santuaren plazan (00:00).
Santakrutzak. biharko egitaraua.
Hilak 17, igandea
- 10:00. Diana eskualdeko dultzaineroekin.
- 12:00. Inude eta artzainen desfilea Lopenetik.
- 17:00. ‘Lezoko hondartza’ haur jolasak Karlos Saldise plazan.
- 17:00. Ur puzgarriak Lopene plazan.
- 18:00. Erraldoi eta buruhandiak.
- 19:00. Kilometro Lezo kultur egitasmoaren azken emanaldiak, Goiko plazan. Dantza emanaldiak dira. DABen Nun zira? eta Ertza konpainiaren Otempodiz obrak ikus daitezke.
- 22:00 Zezen suzkoa Gurutze Santuaren plazan.
