"Israelen genozidioarekin eta okupazioarekin bukatzeko", boikot eskaera
Oiartzungo Carrefour saltokiaren aurrean elkarretaratzea egin dute eguerdian: "Palestinako herriaren aurkako sarraskia babesten ari da".
Donostialdeko BDZ mugimenduak —Boikota, Desinbersioa eta Zigorrak— deituta, elkarretaratzea egin dute eguerdian Oiartzungo Carrefour saltokiaren atarian. Hasiera batean haien asmoa manifestazioa egitea bazen ere, baimena ukatu zieten Herrizaingo Sailetik. Elkarretaratzean zirenak bi taldetan banarazi ditu Ertzaintzak. Bilkura bitartean informazio eskuorriak eman dizkiete hara sartu-irtenean ziren bezeroei, boikota egiteko eskatuz. “Israel boikot, Palestina askatu” oihuekin ezaugarritu dute, besteak beste, gaurko mobilizazioa. Autoetan ere informazio orriak jarri dituzte.
Deitzaileen arabera, saltoki hori Palestinako herriarekiko “Israelen genozidioaren, okupazioarekin, kolonialismoarekin eta apartheidaren konplize” da, Israelgoak diren Electra Comsumer Products eta Yenot Bitan izeneko enpresekin lankidetza akordioak sinatu zituelako 2022ko martxoan: “Israelek herri palestinarraren gaineko kolonialismoari eta apartheidari bakarrik gobernu, enpresa eta erakundeen laguntzarekin euts diezaioke”.
BDZko kideek adierazi dute enpresak legez behartuta daudela giza eskubideak errespetatzera, “eta Palestinako gizarte zibilak luzaroan eskatu die enpresei giza eskubideak urratzen dituztenekin konplizitatea amai dadila”. Gainera, saltokia “Palestinako herriaren aurkako sarraskia zuzenean babesten” ari dela salatu dute, “Israelgo ejerzitoari janaria bidaliz”.
