Oarsoaldeko eremu turistikoak ezagutu ditu Azahara Dominguezek
Gipuzkoako Foru Aldundiko Turismo diputatua Arditurrin eta Albaolan izan da besteak beste, tokian tokiko agintariek lagunduta.
Azahara Dominguezek, Gipuzkoako Foru Aldundiko Mugikortasun, Turismo eta Lurralde Antolaketa diputatua, Oarsoaldeko hainbat txokotan izan da gaur, eskualdeko turismo baliabideak bertatik bertara ezagutzeko. Iñigo Garcia Turismoko foru zuzendaria izan du bidelagun. Anfitrioiak, bertako turismo eremuen berri eman dietenak alegia, honakoak: Joana Mendiburu Oiartzungo alkatea, Teo Alberro Pasaiako alkatea, Fernando Nebreda Oarsoaldea Garapen Agentziako kudeatzailea, eta Olatz Olaizola Oarsoaldea Garapen Agentziako Turismo Saileko arduraduna.
Besteak beste, Oiartzungo Arditurriko eremua eta Pasaiako Albaola bisitatu dituzte. “Eskualdeko bakoitzeko indarguneak eta beharrak ezagutu behar ditugu, eta bertako eragileekin harreman zuzen eta etengabea izan behar dugu. Izan ere, horrela bakarrik ulertuko ditugu turismo sektoreak lurralde osoan dituen beharrak, eta era orekatuago batean landuko dugu industria turistikoa”, adierazi du Dominguezek.
Hala, Oarsoaldean zehazki zentratuta, bertako turismoa hobetzeko helburu komunei buruz hitz egiten dute bisitaldian zehar, “gure lurralderako garrantzi handiko aktibo turistikoa baita Oarsoaldea”.
Gipuzkoan turismoa era iraunkorrean garatzeko egitasmoa lantzen ari direla adierazi du foru diputatuak, eta horren bide-orria Turismoaren Plan Estrategikoa izango dela.
