Papinek I. Futbito Txapelketa antolatu du
Papineko Gazteriak ondutako txapelketa urtarrilaren 6an lehiatuko da, Ibaiondon. Izen-emateak Papineko Instagram kontuaren bitartez egin behar dira, hilaren 31 baino lehen.
Papineko Gazteriak Papineko I. Futbito Txapelketa antolatu du urtarrilaren 6rako. Papinekoek 16 orduko txapelketa bat ondu dute, eta Ibaiondo pilotalekuan lehiatuko da.
Txapelketan areto futboleko arauak errespetatuko dituztela adierazi dute antolatzaileek. Talde bakoitzak zortzi jokalari izan beharko ditu gehienez, eta jokatu ahal izateko, beharrezkoa da 16 urte baino gehiago izatea. Kantxan hiru jokalari eta atezaina arituko dira partida bakoitzean, eta hamabi minutuko bi zati jokatuko dituzte. Neurketa berdinketarekin bukatzen bada, hiru penalti jaurtiko ditu talde bakoitzak.
Izen-emateak Papineko Gazteriaren Instagram kontura mezu pribatua idatziz egin behar dira. Mezu horretan, taldearen eta taldekideen izenak zehaztu eta kontakturako telefono bat bidali beharko dira. Izena emateko azken eguna hilaren 31 da, eta talde bakoitzak 20 euro ordaindu beharko ditu parte hartzeko.
Papinek ere sariak banatuko dizkie honakoei: jokalari onenari, txapeldunari, txapeldunordeari, golegile nagusiari eta finaleko jokalari onenari.