Bizi Errenteria bonu kanpaina astelehenean bukatuko da
Errenteria-Oreretako 18 eta 35 urte arteko gazteei begirakoa izan da azken kanpaina hori, gazteek herrian erosteko ohitura sustatu asmoz.
Astelehenean bukatuko da bonu kanpaina. Astelehenean, hilak 11, bukatuko da Bizi Errenteria bonu kanpaina. Irailaren 4an abiatu zuen udalak kanpaina hori udalerriko 18 eta 35 urte arteko gazteei begira, honakoan. Helburu garbi bat zuen kanpainarekin udalak, gazteen artean herrian erosteko ohitura sustatzea.
Horren harira hamarna bonu jaso dituzte etxeko buzoian adin tarte hori duten errenteriarrek, 10 euro edo gehiagoko erosketetan 5 euroko hobaria suposatzen dutenak; denera, gazte bakoitzak 50 euro jaso ditu bonuetan. Udalaren inbertsioa berriz, 350.000 eurokoa izan da, “herriaren eta herritarren suspertze ekonomikoa sustatzeko eta gazteen kontsumo ohituretan eragiteko”.
Kanpainarekin bat egin duten establezimenduak ere asko izan dira, 150 denera. Udalaren esanetan, “Errenterian tokiko ekonomiak eta merkataritzak duten garrantziaren erakusle. Bonu kanpaina amaitzeko egun gutxi falta direla baliatuta eta Gabonak ate joka direla, bideo sorta zabaldu du udalak gainera, sare sozialen bidez, tokiko ehun ekonomikoa ikusarazteko, “bideo horien bidez herrian bertan kontsumitzearen garrantzia eta eragina nabarmen jartzen da, tokiko ehun ekonomikoaren indarra aitortuz”.
Tokiko dendetan erosteak bertako ekonomia bultzatzen duen zalantzarik ez da; hortik harago doa baina eragina udalaren esanetan, “funtsezko zeregina betetzen du komunitate oparoago eta kohesionatuago baten garapenean”.
Iraunkortasuna ere aipatu du: “Tokian tokian erostea aukeratzean, murriztu egiten da produktuen garraioari lotutako karbono aztarna eta ingurumena zaintzen eta komunitate iraunkorrago bat eraikitzen laguntzen da”.
