[Erreportajea] Bixi-Bixi elkartea, Saharan sahararrak laguntzeko
Elkarte sanjuandarreko hamar kidek Sahararako bidea hartu zuten iragan larunbatean hamar eguneko bisitaldia egiteko. Helburu argi batekin joan dira bertara: «Herri batekin lan egitea».
Bixi-Bixiko kideak, Saharako ikastetxe batean, bertako ikasleekin. Donibaneko Bixi-Bixi Kultur Elkarteko hamar kidek Sahararako bidea hartu zuten iragan larunbat goizaldean hamar eguneko bisitaldia egiteko. Bihar itzuliko dira, eta etzi iritsiko dira etxera. Elkarte sanjuandarrak urteak daramatza Saharako herriarekin elkarlanean, eta oraingoan pauso bat gehiago eman dute, hango egoera bertatik bertara ezagutzen ari baitira. Sanjuandarrek argi dute elkartasunak ezin duela «hutsala» izan, eta «in situ» ari dira ikusten sahararrak nola bizi diren.
Saharan lanean ari den kideetako bat da Itziar Goienetxea. Nabarmendu du Saharako bisitaldia ez dela soilik Oporrak Bakean programako familiak bisitatzea, baizik eta «herri batekin lan egitea, horri begira egingo dugu lan guztia. Guk ez dugu nahi jendeak gu goraipatzea, herri hau lagundu nahi dugu».
Motxilak material eta arropaz betetzeaz gain, gauzatu nahi dituzten egitasmoez ere bete zituzten. Hala, desgaitasuna duten pertsonen ikastetxe batean argia jarri eta materialez hornitu dute, eta pertsona horiek josten ikasi dezaten, josteko makinak eraman dituzte. Haurtzaindegi bateko gela guztietan argia jarri dute, eta urarekin «arazo handiak» dituztenez, ur biltegi bat ezarri dute. Oftalmologia arreta ere eskaintzen ari dira Bixi-Bixikoak.
Goienetxeak nabarmendu du jendea Saharara «ezagupen murritzarekin» doala, lehen pertsonan ikusi behar baita benetan nola bizi diren. Hori dela eta, Auserdeko gobernadorearekin, Auns Emakume taldearekin edota hainbat ministrorekin elkartu dira. «Atal bakoitzean zein helburu dituzten eta lanketa hori nola egiten ari diren jakin behar dugu». Saharako herriak dituen beharrak «handiak» direla adierazi du Goienetxeak, eta argi utzi du sahararrek «laguntza beharrezkoa» dutela.
Bisitaldian, Oporrak Bakean programako familiak bisitatu dituzte. Eskerrak emateaz gain, gauza bat eskatu dietela jakinarazi du Goienetxeak: «Familia gehiago lortzea haurrak Saharatik ateratzeko». Saharatik «etxeko lanekin» itzuliko direla baietsi du Bixi-Bixiko kideak, eta urtebeteko lanketa bat abiatuko dute egindako azterketatik. Ondoren, hurrengo urtera begirako lan ildoak eta plangintzak definituko dituzte.
