Iratzerri, energia komunitatea sortzeko bidean sendo
Lezoko taldea konbentzituta dago herrian energia komunitatea eratzeko aukerak daudela. Hori zehatz jakiteko, ordea, galdetegia zabaldu du lezoarrek erantzun dezaten.
Lezoko energia komunitatea eratzeko urratsak egiten jarraitu nahi du herriko Iratzerri taldeak. Energia komunitateen helburu nagusia da komunitatearenzat berarentzat energia berriztagarrietan oinarritutako soluzioak lortzea, besteak beste energia kontsumoa murrituz, eta energia subiranotasunari eutsita tokiko ekonomia sustatuz energia enpresa handien ereduarekin aurrez aurre. Zeregin horretarako bideratu zuen Iratzerrik bere izaera, honako arloekin batera: herrian trantsizio energetikoaren gaia zabaltzea, energiaren gaineko aholkularitza ematea, eta energia berriztagarrien gaineko informazioa gizarteratzea.
Bidea, baina, ezin dute taldekideek bakarrik egin. Horren jakitun, lezoarrei gogoetarako aukera eman diete inkesta bidez; bertako galderak erantzunez jakin nahi dute ea herritarrek zer nola irudikatzen dituzten energia komunitateak, eta aldi berean, horietako batek Lezon etorkizunik ba ote duen ikertu nahi dute. Galdetegia taldearen sare sozialetan nahiz oarsoaldea.hitza.eus webgunean lor daiteke.
Jokin Susperregi taldekideak adierazi du inguruko hainbat eragilerekin harremana dutela, beraz, argi dutela zer diren energia komunitateak. Hala, Oarsoaldeko Energia Bulegoarekin badute erlazioa, eta gertutik ezagutzen dituzte Errenteria-Oreretako (Ekiherri) edo Oiartzungo (Argitturri) energia komunitateen esperientziak. Gainera, Lezoko Udalarekin ere harremana badute, eta aste honetan bertan izan dute bilkura haiekin. «Konbentzituta gaude energia komunitatera joan behar dugula. Nahi dugu jakin ea Lezon gaia guk bezain garbi duen jenderik badagoen», esan du Susperregik, «gaia berotu nahi dugu, jakin-mina sortu».
Jendartera zabaldu
Inkestaren bidez iritziak bildu nahi dituzte. Baita herritarrak taldera hurbilarazi ere. Adibidez, energia komunitatea sortzekotan, Goienerren hiru hankako eredurantz joango lirateke, arlo juridikoko, arlo teknikoko edo komunikazioko lantaldeekin. «Prest gaude edonork informazio gehiago behar balu, harekin egoteko. Aurrerago deialdi irekia egingo dugu, jendartera egitasmoa zabaltzeko», zehaztu du Susperregik.
