Musika, mahai-ingurua eta solasaldia Emakumeen Etxean
Hiru jarduera antolatu dituzte urtea bukatzeko. Tartean, Frankismo garaiko erreformatorioetan bizitako errepresio misoginoaz eta eskubide urraketaz ariko dira hiru emakume
Idoia Hernandez Hatxek hasiko ditu jardunaldiak. Musika, errepresio frankista eta ikasketak homologatzeak emakume migranteentzat duen garrantziaren gaineko hiru jarduerarekin bukatuko du urtea Emakumeen Etxeak. Musikari eskainiko dio lehen jarduera. Asteartean izango da —hilaren 12an— Hatxe piano jotzailearen eskutik. Zehazki, Hatxerekin kontzertua, tertulia eta bizkotxoa saioa egingo dituzte 19:00etan hasita. Idoia Hernandez Toledo Hatxe pianistak gidatutako saioan, musika, irudiak, musikaren gorputza, eta zaintzaren musika izango dituzte hizpide. Gainera, bizkotxoa dastatzeko aukera izango da. Euskaraz izango da.
Hilaren 16an, larunbatarekin, egingo dute bigarren jarduera, 11:00etan hasita. Las desterradas hijas de Eva: isiltasun gehiagorik ez mahai-ingurua antolatu du egun horretarako Emakumeen Etxeak. Mariaje Lopez, Consuelo Garcia del Cid Guerra eta Fatima Diez idazleek hartuko dute parte.
Hiru emakume horiek erreformatorio frankistetatik pasa ziren, eta han bizitutakoak hainbat liburutara eraman dituzte. Frankismo garaian zein horren ondoren ere Emakumea Babesteko Patronatuak dozenaka eta dozenaka emakume eta neskei ezarritako errepresio misoginoa salatu dute argitalpen horietan.
Giza eskubideen urraketa
1941. urtean sortu zuten Emakumeen Babeserako Patronatua. Instituzio publikoa zen, eta bere menpeko zentroetan itxita zituzten emakume eta neska gazteen kontra egindako giza eskubideen muturreko urraketengatik egin zen ezagun. Frankismoan, instituzio horrek zentro itxiak zituen eta erlijio ordenek kudeatzen zituzten. «Erori edota erortzeko arriskuan» ziren emakumeak sarrarazten zituzten horietan, prostituzio-etxeetan poliziak egindako sarekadetan atxilotutakoak «jarrera ez-morala» izateagatik, senideen edota norbanakoen salaketengatik, edo norberak edota gurasoek eskatuta.
Bizipen horiek guztiak bertaratzen direnekin partekatuko dituzte Lopezek, Garcia del Cid Gerrak, eta Diezek Emakumeen Etxean egingo duten mahai-inguruan; gaztelaniaz izango da.
Azkenik, kafe solasaldia antolatu dute hilaren 16rako. Nire ikasketak homologatu, zertarako? Emakume migratuen esperientziak eta lorpenak izenburupean ariko dira, 16:00etatik 18:00etara. Hori ere, gaztelaniaz da. Jarduera horren helburua da beste emakume migratu batzuen urratsak eta lorpenak ikusaraztea, jatorrizko herrialdean egindako ikasketak homologatu ostean.
Bidez Bide elkarteko Katia Reimbergek gidatuko du kafe solasaldi hori, eta Parekatu ikasketak homologatzeko eta prestakuntza ibilbideetan aholkularitzatik igarotako erabiltzaile batzuen esperientzia bertatik bertara ezagutzeko aukera izango da.
Emakumeen Etxeak, ateak irekita
Emakumeen Etxearen arduradunek parte hartzera deitu dituzte herritarrak antolatutako hiru jardueretan, eta horrekin batera, nabarmendu dute ateak zabalik izango dituela ohiko ordutegi eta egunetan. Astelehen eta ostiraletan 09:00etatik 13:00etara izaten da zabalik, eta asteartetik ostegunera, berriz, arratsaldez: 16:00etatik 20:00etara.
Telefonoa ere herritarren eskura duela gogorarazi dute: informazioa eskatu nahi duen orok 943 44 96 30 telefono zenbakira deitu behar du.
