Palestinaren aldeko elkarretaratzea, ostiralean
Orereta Palestinarekin Herri dinamikak deitu du protestara. Palestinako banderak balkoi eta leihoetan zintzilikatzeko ere eskatu du.
Palestinako banderak balkoi eta leihoetan jartzera deitu du Orereta Palestinarekin Herri dinamikak. Palestinaren alde elkarretaratzera deitu dute. Ostiralean izango da protesta hori Orereta Palestinarekin Herri dinamikak deituta, 19:00etan Zumardian. Parte hartzera deitu dute, eta Israelgo Estatua Palestinaren aurka egiten ari den genozidioa salatzea “urgentzia bizikoa” dela iritzita.
Gaur gaurkoz, zabaldutako azken datuen arabera, Israelek 17.620 palestinar hil ditu Gazako zerrendan. Zaurituak, berriz, 46.739 dira eta Gazako populazioaren %80 ia 1,9 milioi herritar desplazatu dira Gazako zerrendan.
Dinamikak halaber, Palestinako banderak etxebizitzetako balkoi eta leihoetan jartzeko eskatu die herritarrei, “Palestinari elkartasuna adierazi, eta estatu sionistaren genozidioa salatzeko. Garrantzitsua da Palestinako banderen presentzia”. Horren harira, banderak eta txapak herriko hainbat tabernetan salgai direla jakinarazi du; banderak 5 euroan eta txapak euro batean. Hona zerrenda: Landare, Arkaitza eta Sindikato tabernetan. Halaber, antolatzen dituzten elkarretaratze, hitzaldi eta bestelako iniziatibetan ere eskuratu daitezke bandera eta txapak.
Beste biak bezain garrantzitsuak diren beste deialdi bat ere zabaldu du dinamikak: “Boikota egin. Ez erosi Israelgo produkturik. Ez eman xentimo bat bera ere Palestinaren genozidioaren arduraduna den estatu sionistari, ezta harekin lerratu direnei ere”.
Bukatzeko, antolatutako jardueren gaineko informazio guztia X, Facebook eta Instagram sare sozialetan zabaltzen duela azaldu du herri dinamikak.
