Antxotarrek San Tomas eguna ospatuko dute larunbatean
Papineko Gazteriak eta Antxoko Topaguneak egun osoko programazioa ondu dute, elkarlanean. Txistorra eta taloak, babarrun jana, kontzertu akustikoa eta elektrotxaranga, larunbateko menua.
San Tomas eguneko ospakizunak hilaren 21ean izaten badira ere, antxotarrek aurre hartuko diote egun horri, larunbat honetan ospatuko baitute Antxoko San Tomas eguna. Egun hori jai giroan ospatzeko, egun osoko programazioa ondu dute Papineko Gazteriak eta Antxoko Topaguneak, elkarlanean.
Antxotarrak goizetik jarriko dira martxan, 11:30etik aurrera txistorra eta taloak eskuratzeko aukera izango baita, Papineko Gazteriaren eskutik. 12:00etan, Pasaia-Lezo Lizeoko ikasleek kantaldia eskainiko dute. Kantaldiaren ondoren, Alkarkide taldearen erromeria izango da.
15:00etan, Antxoko Topaguneak babarrun jana antolatu du jubilatuen elkartean. Gaur da bazkariko sarrerak eskuratzeko azken eguna. Mimos tabernan eros daitezke, 22 euroko prezioan. Honakoa da menua: Babarrunak sakramentuekin, postrea, kafea, ura eta edaria. Bazkaldu ondoren, Garazi eta Salak kontzertu akustikoa emango dute.
Antxoko San Tomas eguna biribiltzeko, Matraka Elektrotxarangak barrutiko kaleak girotuko ditu 19:30etik aurrera.
- 11:30: Txistorra eta taloak Papineko Gazteriaren eskutik.
- 12:00: Pasaia-Lezo Lizeoko ikasleen kantaldiak.
- Ondoren, Alkarkiderekin erromeria.
- 15:00: Babarrun jana jubilatuen elkartean Antxoko Topagunearen eskutik. Bazkaldu ondoren, Garazi eta Salaren kontzertu akustikoa.
- 19:30: Matraka Elektrotxaranga.
