Ereintzaren Olentzero, prest
Gabon Eguneko 18:15ean aterako da herriko elkartearen Olentzero. 20:00ak aldera bukatuko dute bidea, Herriko Plazan.
Ereintza Elkarteak aurten ere Olentzerorekin bira egingo du herritik Gabon Egunean (hilaren 24an). 18:15ean dira ateratzekoak elkartearen egoitzatik (Juan Olazabal kalean dago), baina bertan atera nahi dutenei 17:45ean han izateko eskatu diete, baserritarrez jantzita den-dena garaiz egiteko.
Atera aurretik kantuen liburuxkak banatuko dizkiete behar dituztenei. Edonola ere, horiek aurretik entseatu daitezke elkartearen webgunean doinu guztiak zintzilik dituztelako, doinu eta letrekin. Kantariei laguntzen Ereintzako txistu eta tronpeta bandak nahiz Andoitz Antzizar trikitilaria izango dira. Abeslariak Xabier Vegak zuzenduko ditu.
Honako geldialdiak egingo dituzte: Juan Olazabal Kalea (hasiera); Biteri eta Xenpelar kaleen bidegurutzean; Madalena kalean; Mikelazulon; Santa Klara kalean; Gamon Zumardia zeharkatu, eta Biteri kalean Otordun. Ibilbidea bukatzeko, Olentzero Andra Mari kaletik jaitsi eta Herriko Plazara iritsiko da 20:00ak inguruan, han saio berezia egiteko.
Saio berezi horretan, Errenteria Musika Kultur Elkarteko musikariak gehituko zaizkie, baita presoen aldeko Olentzero eta Mari Domingi ere. Haur eder baten bila, Horra Mari Domingi, Olentzero joan zaigu eta Hator hator kantak abestuko dituzte han.
