Dantza eta musika eskutik, urte berriko kontzertuan
EMKE Musika Bandarekin batera, Josune Gurrutxaga eta Jon Menor dantzariak ariko dira Koldo Mitxelenako jolastoki estalian.
EMKE Banda Atseden handirik hartu gabe, 2024ko denboraldiari hasiera emango dio EMKEren Musika Bandak larunbatean —hilak 6— urte berriko kontzertuarekin. Koldo Mitxelena ikastetxearen jolastoki estalian izango da emanaldia, 12:30ean hasita.
Ez da musikaz gozatzeko aukera izango soilik, izan ere, emanaldi berezian dantzaren eskutik helduko da EMKE; Josune Gurrutxaga eta Jon Menor dantzariek ere hartuko dute agertokia. Musika Bandak azaldu duenez, dantzak protagonismo berezia izango du larunbateko emanaldi horretan, “horrekin batera, proposamen eszeniko musikal berritzaileak aurkeztuko ditugu”.
Gurrutxaga eta Menor dantzariei erreferentzia egin die EMKEk. Irundarrak dira biak. “Got Talent —Espainiako Tele 5 kateak ematen du— aurreko edizioan zirrara sortu zuten. Bi dantzari handi hauen plastikotasun eta profesionaltasunaz gozatu ahal izango dugu bals erritmoan”. Hamarkada pasa darama bikote artistikoak dantzan, hamar urte lehiatzen, eta duela bost urtetik 22 Academyn dantza irakasten. Ez dira berriak urte berriko kontzertuan Errenteria-Oreretan, iaz ere parte hartu zuten.
Zuzendari lanetan, Aitor Mitxelena Rubio. Kontzertua berriz, klasiko handien eskutik egindako musika bidaia izango da, Johan Strauss aita, Johan Strauss semea, Louis Hector Berlioz, eta Dimitri Shostakovitchen doinuen barrena.
Larunbatekoa, “zorrotza” eta kontzertuz betea izango den denboraldiaren lehen urratsa izango dela esan du musika bandak, “denboraldi exijentea izango da”.
Herritar guztiak deitu ditu EMKE Musika Bandak kontzertuarekin bat egitera. Txikienei begira, gainera, “sorpresatxoa” prestatu dutela kontzertu amaieran jakinarazi du. Zita hilaren 6an, larunbata, 12:30ean Koldo Mitxelena ikastetxeko jolastoki estalian.
