Ipar martxa irteera Urdabururekin
Hilaren 13an egingo dute, bi aukera izango dira, eta eguraldiaren arabera erabakiko dute zein egin.
Urdaburuk antolatutako ipar martxa irteera bateko artxiboko irudia. Ipar martxa irteera antolatu du hilaren 13an, larunbata, Urdaburu mendizale elkarteak. Bi aukera aurreikusi ditu egun horretarako, eta azaldu duenez, eguraldiaren arabera erabakiko dute bat edo bestea egin. Lehen aukeraren alde egiten badute, Tolosara joko dute ibilbidea egitera. Lezoko tren geltokian egin dute zita horretarako 07:55ean —08:04an irteten da trena bertatik— eta ez direla inoren zain izango jakinarazi dute antolatzaileek.
Irteera horren barruan bigarren zita ere egin dute: Tolosan trenaren bigarren geltokian 08:50ean.
Ibilbidea berriz, honakoa izango da: Tolosa, Oria ibaia, Elosegi, Zabalarreta eta Zumardi Handia parkeak, eta San Blas ermita. Denera, 9 kilometro ingurukoa izango da ibilbidea eta urbanoa, “asfaltoaren gainean ibiliko garenez kirol oinetakoak nahikoak izango dira”, azaldu dute. Beti bezala, ipar martxako makilak ezinbesteko izango dira.
Zerkausia merkatutik pasako dira eta azoka larunbatetan egiten dutenez, ibilbidearen amaieran ikusteko aukera izango dute.
Bigarren ibilbidea, eguraldia onarekin egitekoa, arratsaldez proposatu du mendizale elkarteak eta ipar martxa eta izarren behaketa batu ditu. Horretarako baina, ezinbesteko baldintza da zerua garbi izatea. 18:00etan elkartuko dira Orereta Ikastolaren Añabitarteko eraikinean. Handik, Bizarain mendira eta San Marko gotorlekura igo eta jaitsiko dira. 20:00ak aldera berriz, ikastolako baserrian zerbait jan eta astronomo baten laguntzarekin izarrak ezagutzeko aukera izango dute parte hartzen dutenek.
Izena eman nahi dutenek gaurtik hilaren 10era arte izango dute aukera. Urdaburu mendizale elkartearen egoitzara jo behar dute horretarako astearte eta ostegunetan 19:00etatik 21:00etara edota telefonoz deituta 943 52 78 79 zenbakira. Online ere egin daiteke izena ematea, horretarako egin klik hemen.
