Ekainera bitartean, 48 kultur ekitaldi Lezon
Euskaraz eta aterpean izango dira gehienak. Lesoinuk otsailean, martxoan eta maiatzean girotuko du herria.
2024ko lehen hilabeteetarako udalak eta herriko eragileek antolatu dituzten kutur ekitaldiak aurkeztu dituzte Jon Legorburu Kultura zinegotziak eta Xanti Val teknikariak. Datu bat eta hainbat argibide eman dituzte. Datua: urtarriletik ekainera 48 kultur ekitaldi antolatu direla, gehienak euskaraz. Argibideak eman ditu Legorburuk: “Egitarau interesgarria antolatu dugu, denetik izango dugu herrian neguan eta udaberrian: musika, antzerkia, zinema, hitzaldiak, kultur solasaldiak…”. Horietatik gehienak Gezala Auditoriumean izango dira, baina Andreone Udal Liburutegian, Tomas Garbizu Musika Eskolan, edo kalean ere egingo dituzte.
48 ekitaldi horietatik nabarmenenak aipatu dituzte agerraldian. Lehena, ostiralekoa: Pirritx, Porrotx eta Marimotots pailazoek urteroko emankizuna egingo dute Bekoerroeta kiroldegian.
Bestalde, arte eszenikoen esparruan, helduentzat sei antzerki emanaldi izango dira ekaina bitartean, eta goi mailako bi dantza saio. Andreone bost literatura solasaldiren etxe izango da aldi berean, eta Lezo-Jaizkibel mendiko lasterketari lotura Oihana Kortazar kirolariak hitzaldia emango du otsailaren 21ean.
Hala ere, emanaldien zaku handiena musikaren eskutik iritsiko da, Lesoinugatik batez ere. Otsailean, martxoan eta maiatzean askotariko emanaldiak jasoko ditu herriko musika eta sormen zikloak.
Egitaraua, zehaztasun guztiekin, etxez etxe banatuko dute. Edonola ere, hemen klikatuz gero, zure gailu elektronikora jaitsi dezakezu.
Elkarlanean
Ekitaldien berri emateko agerraldian udal ordezkariek parte hartu badute ere, azaldu dute herriko eragileen lanik gabe zaila litzatekeela ekainera arteko egitaraua osatzea. Horiei esker ona adierazteaz gain, banan-banan zerrendatu dituzte: udalaren zati diren Tomas Garbizu Musika Eskolaz, Udal Liburutegiaz eta Kultura sailaz gain, Lezoko Zinema Ttikiari, Orratx! Antzerki Taldeari eta Lezo Jaizkibel Mendi Lasterketa Taldeari eskerrak eman dizkiete.
