EHKS aurkeztu dute Oarsoaldean
EHKS Euskal Herriko Kontseilu Sozialista antolakunde berria joan den abenduaren 16an aurkeztu zuten Eibarko Astelena pilotalekuan. Orain eskualdeka ari da aurkezten.
EHKS aurkeztu dute Oarsoaldean. EHKS Euskal Herriko Kontseilu Sozialista antolakunde berria joan den abenduaren 16an aurkeztu zuten Eibarko Astelena pilotalekuan. Orain eskualdeka ari da aurkezten, eta Oarsoaldekoa Errenteria-Oreretan egin zuen atzo, zehazki, Reina aretoan. Unai Moriones oreretarrak eta Amets Sarasua lezoarrak gidatu zuten aurkezpena.
Azken urteetan hasitako zenbait mugimenduren adierazpen nagusi gisa aurkeztu zuen EHKS Morionesek, “2019an GKS Gazte Kontseilu Sozialista aurkeztu genuen, eta ordutik hona mugimendu sozialistaren lorratza pean gaitasunak biderkatzen joan gara, antolatzen, gure aktibitate oro era efektibo batean aurrera eramaten. Ez da ezerezetik sortua, hortaz, bere ondarea du, eta gutako asko bagara beste militantzia esparruetatik heldutakoak”.
EHKS, duela hiru urte aurkeztu zituzten tokian tokiko Kontseilu Sozialistaren “enbor nagusi edo oinarrizkoa” dela gaineratu zuten bi kideek. Egungo testuinguruaren analisia egin zuten ondoren “ikuspuntu marxista batetik. Horren garrantzia nabarmendu nahi dugu, horrek, gure analisiari klase ikuspuntua ematen baitio. Gu hemen gaude, hain zuzen ere, uste dugulako iraganetik jaso behar dugun ondarearekin eta lekukoarekin, gure boterea antolatu behar dugula kontraofentsiba bat egiteko. Burgesiarena den klase kontraofentsiba irauli, eta proletariotzaren edo langileen ofentsiba sortzeko”.
Ziklo iraultzaileari segida
EHKS aurkeztu dute Oarsoaldean.
EHKSren nazio aurkezpenaren barruan, Estrategia Sozialista Berria gisa izendatutako agiria aurkeztu zutela aipatu zuen bestalde, Sarasuak, atzokoan, “berria terminoa erabili dugu, ez estrategia sozialista berri hori hutsetik eraikia dela uste dugulako, edo gure burua orain arteko ezerekin alderatzen ez dugulako, baizik eta ulertzen dugulako orain arte emandako prozesu historiko horren hainbat elementu berritzea, beste hainbat baztertzea dagokigula orain arte emandako ziklo iraultzaileari jarraipen bat emateko helburuarekin”.
Politika egiteko eta ulertzeko “beste modu” bat dela eurena ere azaldu zuten atzoko aurkezpenean, “parlamentarismotik harago doan, eta eguneroko politika baten alde egiten dugu. Horrek diziplina militante bat eta eguneroko lana eskatzen du, bakoitzak ahal duena emanda”. Lan horren bidez, jendartean “zentzu komun sozialista bat” plazaratu eta zabaltzea dutela helburu erantsi zuten.
Programaren zazpi puntu nagusiak
Ondoren EHKSren programa proposamena osatzen duten zazpi puntuen berri eman zuten. Honakoak: Gerra inperialisten aurka, NATO desegitea; Estatuen erreforma autoritarioen aurka faxismoari aurre egitea; bizitzaren garestitzearen aurka kalitatezko bizi baldintza unibertsalak; ekosistemen suntsiketaren aurrean txikizioa gelditzea; estatu zapaltzaileen aurrean autodeterminazioa euskal langileriarentzat; emakume langileen zapalkuntzaren aurka horiek lehen lerroan jartzea; eta azkenik, estatu zapaltzaileen aurka borroka egin dutenen askatasuna lortzeko, langileriaren militante politikoentzat amnistia eta aitortza.
