Donibaneko kiroldegia instalazio fotovoltaikoez hornitu dute
Energia iturri berriztagarrietan oinarritutako energia trantsizioa bultzatzeko eta hobetzeko helburuarekin, Pasaiako Udalak 24 modulu instalatu ditu eraikinean.
Pasaiako Udalak, energia iturri berriztagarrietan oinarritutako energia trantsizioa bultzatzeko eta hobetzeko helburuarekin, beste instalazio fotovoltaiko bat jarri berri du. Oraingoan, Donibaneko kiroldegian ezarri dituzte panelak.
Orotara, 24 modulu fotovoltaiko instalatu ditu udalak eraikinean, eta urtean 10.502,83kWh sortzea aurreikusi dute. Udal erakundeak energia hori eraikineko autokontsumorako erabiliko du, eta soberakina energia sare orokorrean txertatuko dela jakinarazi dute.
Horrez gain, Energiaren Euskal Erakundeak (EEE) 9.720 euroko diru laguntza eman dio udalari. Proiektua energia iturri berriztagarrien bidezko autokontsumo eta biltegiratzearekin eta bizitegi sektorean sistema termiko berriztagarriak ezartzearekin lotutako pizgarri programari lotuta dago, Suspertze, Eraldatze eta Erresilientzia Planaren esparruan, Europako Batasunak finantzatuta (NextGenereationEU).
