Xoxolurren sasoiko laugarren irteera, Lapurdira
Igandean egingo dute urte berriko lehen txangoa Xoxolurrekoek. Izen emate epea zabalik da, ostegunera arte, Orkin eta posta elektronikoz.
Denboraldiko laugarren irteera, 2024ko lehena, Lapurdira egingo du Xoxolur Mendi Klubak. Zehazki, iganderako ezarri dute bidaia, hilaren 14rako. Herrialde horretako Mondarrain gaina bere egingo dute mendizaleek, 749 metrokoa. 2-3 orduko mendi buelta izango da, eta umeen erritmoa errespetatuko dute. Ibilaldiaren ondoren inguruko herri bateko estalitako frontoian bazkaldu, eta beti bezala, jolasean ariko dira.
Izen emate epea zabalik da, ostegunera arte. Bi bide daude apuntatzeko. Batetik, zuzenean Orki tabernara joan daiteke eta hango zerrendan izena eman. Bestetik, posta elektronikoa ere badu Xoxolurrek irteerarekin bat egin nahi dutenentzat. Gazteek 8 euro ordaindu behar dituzte, eta helduek 10.
Igandean, 08:30ean da autobusa Ijurkotik ateratzekoa. Aholkuen zerrendan, bat nabarmena: bi motxila eramatea. Lehena mendira eramatekoa izango da ibilaldirako beharrezkoa diren osagaiekin (hamaiketakoa, txubaskeroa…). Bestea autobusean geldituko da bazkal ordura arte, eta han aldatzeko arropa zein oinetakoak eta bazkaria gordetzea aholkatu dute.
Zazpigarren urteurrena
Xoxolurren zazpigarren ikasturtea da mendi zaletasuna, eta familia giroan ingurumenaren zaintza nahiz euskararen erabilera sustatzen. Horregatik, 2023-2024 sasoiko irteeretarako helburua jarri dute: Euskal Herriko zazpi herrialdeetako zazpi gain igotzea, denak 700 metro ingurukoak.
Igandekoaz gain, honakoak dira sasoi bukaera arteko irteerak:
- Otsailaren 18an. Aizleor (Segura), 723 metrokoa.
- Martxoaren 17an. Oarsoaldeko ibilbide neurtua.
- Apirilaren 14an. Arabako Pagolar (Luiaondo), 722 metrokoa.
- Maiatzaren 12an. Nafarroako Arxuria (Etxalar-Zugarramurdi), 758 metrokoa.
- Ekainaren 15 eta 16an. Zuberoako Maidalena (Atharratze, 794 metrokoa) eta Nafarroa Behereko Handiaga (Donibane Garazi, 761 metro).
