"Prest gaude presoen etxerako biderako ateak irekiko dituzten giltzak gure eskuetan hartzeko"
Pasaiako Sarek agerraldia egin zuen atzo, herriko eragile eta norbanakoekin, larunbateko Bilboko manifestaziorako deia egiteko.
Dozenaka izan ziren atzo San Pedroko frontoian Sareren deialdiari jarraiki bildu ziren norbanako eta eragileetako ordezkariak. Euskal preso, iheslari eta deportatuen egungo egoeraren irakurketa egin, eta larunbatean Bilbon egitekoa den nazio manifestaziora joateko deia egin zuten. “Prest gaude konponbiderako, elkarbizitzarako, biktima guztien minen errespeturako, eta presoen etxerako biderako ateak irekiko dituzten giltzak gure eskuetan hartzeko”, esan zuten. Hala, “lege arruntak dion bidetik”, euskal presoei aplikatzen zaizkien “salbuespenezko neurriak” betiko bazter daitezela eskatu zuten.
Goiz euritsuan, San Pedroko pilotalekuren aterpea baliatu zuten agerraldirako. Manifestua irakurri zutenak Liher musika taldeko Iñigo Etxarri, Oihana Cereijo batelari ohia, eta Mikel Astarloza txirrindulari ohia izan ziren. Haiek esandakoa bertan izan zirenek eta herriko elkarte eta eragile askok (behean zerrenda) baietsi zuten. “Giltzari esker sartu eta irten egiten gara: aurrera egiten dugu. Edo atzean geratzen gara gotorturik. Ateak itxi behar dira iraganeko minak, gorrotoak eta biolentziak atzean uzteko, inoren sufrimendua ahaztu edo gutxietsi gabe, iragani begiratu ahal izateko, orainaldirako eta etorkizuneko irakaskuntza gisa. Zabaldu behar dira konponbideari ateak irekitzeko”.
Aurrera urratsak egiteko, ordea, azaldu zuten beharrezko dela “iraganean betikotzen gaituzten ateak itxi, eta euskal preso, iheslari eta deportatuen aferari” irtenbidea ematea, eta akordio bidez “biktima guztiei tratamendu justu eta berdina ematea ahalbidetuko duten ateak irekitzen jarraitzea. Oraindik, ordea, ezin izan dugu iraganaren atea behin betiko itxi. Oraindik euskal presoen eskubideek urratuak jarraitzen baitute”. Jendartea elkarbizitzarako ateak irekitzeko lanean dabilela adierazi zuten atzokoan, adostasunak eta desadostasunak modu eraikitzailean egituratuz.
Espetxe eredu “berri, humanizatu eta justuago” batean sakontzeko aldarria egin zuten, “euskal presoei dagozkien eskubideen jabetza aitortuz, herri honetan sufritu duten pertsona guztiak aintzak hartuz, eta biolentzia ezberdinen biktima guztiak errespetatuz”.
Aipatu zuten Pasaiako barruti guztietan daudela zerrendak larunbatean Bilboko manifestaziora joateko (ohiko tokietan daude). Bestalde, atzo irakurritako agiriarekin bat egin duten eragile eta elkarteen zerrendaren berri eman zuten. Honakoak dira (behin-behineko zerrenda da, antolatzaileek HITZAri emandakoa)
- Antxoko eragileak: Basari elkartea, Antxo Areto Futbola, Alkartasuna Euskal Dantza Taldea, Antxoberfest, Papineko Gazteria, Kexaldi.
- San Pedroko eragileak: Kalparra Mendi Taldea, Trapaia elkartea, Patata Tropikala antzerki laborategia, Antxeta elkartea.
- Donibaneko eragileak: Bixi Bixi Kultur Elkartea, Donibaneko txistulariak, Kantu Jira Taldea, Liher musika taldea, Lotura Films ekoiztetxea, Usoa ehiztari taldea, Donipari Areto Futbol Taldea, Donibane Sahara taldea.
