Bizikletak garbitzeko gune bat sortu du Lezoko Udalak
Bekoerrota kiroldegiaren albo batean ezarri dute herri guztiari begirakoa den gune hori. Bi ur mahuka ditu, eta zerbitzua doakoa da. Arduraz erabiltzea eskatu du udalak.
Lezoko Udalak bizikletak garbitzeko gune bat sortu du Bekoerrota kiroldegiaren albo batean, bidegorritik eta parkingetik hurbil. Gune horretan bi ur mahuka ezarri dituzte, bizikletak garbitzeko egokiak direnak. Zerbitzua doakoa da, herri guztiari begirakoa, eta arduraz erabiltzea eskatu du udal erakundeak.
Honakoa esan du Eneritz Arruti Kirol zinegotziak sortu duten guneaz: “Herriko toki egoki batean jarri dugu: kiroldegiaren ondoan eta bidegorritik gertu. Doako zerbitzua da, edonork garbitu dezake bere txirringa bertan. Ez hori bakarrik, mendira joaten diren herritarrek lokatza garbitzeko ere erabil dezakete. Herritarrek zerbitzuaren erabilera egokia egitea bakarrik eskatzen dugu. Denon artean Lezo zaindu eta hobetzen jarraitu nahi dugu”.
