Magikoa izango da martxoaren 23ko gauerdia Errenteria-Oreretan
Martxoaren 23an. larunbatarekin, eta gauerdia izateko minutu gutxiren faltan helduko da 23.Korrika Errenteria-Oreretara.
AEK-ko Borja eta Idoia Arbelaitz anai-arrebak 22. Korrikan lekukoarekin. Martxoaren 23ko gauerdiaren bueltan iritsiko da 23. Korrika Errenteria-Oreretara. Gaur eguerdian aurkeztu du AEK-k euskararen aldeko lasterketa erraldoiak egingo duen ibilbidea. Jakina zen Irunen hasi eta Baionan bukatuko dela 2.700 kilometro ttipi-ttapa osatu eta gero, baina gaur azaldu dute zehatz herrietara helduko den eguna eta ordua.
Harro herri lelopean, Buenabista aldetik barneratuko da lasterketa Oarsoaldean Altzatik behera, eta eskualdearen lekukoa Pasai Antxok hartuko du. Trintxerpe eta San Pedro pasata, itsasoak ere harrera egingo dio euskararen aldeko lasterketa entzutetsuari eta lekukoa barkuz eramango dute, eskuz esku eta etenik gabe, Donibaneraino. Handik Lezora joango da, eta Errenteria-Oreretara 23:48an helduko da. Lezotik iritsiko da eta Erdigunea, Galtzaraborda, Beraun, Pontika eta Fanderia pasa eta herrian arrastoa—ez nolanahikoa—utzita, Oiartzun aldera egingo du Korrikak.
Batzordea datorren ostegunean
Hirurogeita hiru egun falta dira 23.Korrika Irundik abia dadin Euskal Herrian barna euskara hauspotu eta aldarrikatzeko bizi, eta dagoeneko hasiak dira herrietan lanean dena prest izan eta aurretik girotzeko.
Errenteri-Oreretaren kasuan, hilaren 18an egingo dute batzorde horren lehen juntadizoa; Xeneplar AEK Euskaltegian izango da, 19:00etan.
23. Korrikaren testuinguruaren barruan, haren aurretik antolatutako hitzordu bat bederen jakinarazi dute: Hilaren 24an egingo duten Korrikotea.
Ikus hemen klik eginda 23.Korrikak Errenteria-Oreretan egingo duen ibilbidea.
