Hibaikaren 11 batel lehiatuko dira larunbatean Orion
Larunbatean hasiko da Gipuzkoako Batel Liga txapelketa. Zarautzek antolatu du lehen jardunaldia, eta Hibaikako 11 ontzi ariko dira Orioko uretan.
Hibaikako arraunlariak Oiartzun ibaian. Argazkia: Hibaika Arraun Elkartea Larunbatean, hilak 13, abiatuko dute Gipuzkoako Batel Txapelketa, eta Hibaika Arraun elkarteak ez du hutsik egingo. Denera, Errenteria-Oreretako kirol taldearen 11 ontzi izango dira uretan, Orion zehazki, Zarautzek antolatutako lehen jardunaldi horretan.
Haur Mailan bi ontzi ariko dira, nesken eta mutilen bana; promesetan, berriz, bost ontzi ariko dira lehian: lau nesken ontzi eta mutilen bat. Gazte Mailan lau ontzi izango ditu ordezkari txapelketa horretan Hibaikak, nesken hiru, eta mutilen bat.
Larunbatekoa, 15:00etan hasiko da, eta klubak dei egin dio marea beltzari arraunlariak animatzera joan daitezen.
Gu Gara Marea Beltza Whatsapp kanala
Bestalde, zale kopurua handitu nahian, Gu Gara Marea Beltza whatsapp kanala sortu du Hibaika Arrun Elkarteak, “Hibaikaren inguruko albisteekin zipriztindu nahi duten guztiei begirakoa da kanala. Helburua gure familia handitzea da”. Kanalarekin bat egiteko egin klik hemen.
