Hamabost minutu ahaztezin utziko ditu 23. Korrikak Lezon
Martxoaren 23ko 23:33an iritsiko da 23. Korrika Lezora, Donibanetik. Herrian egin beharrekoak prestatzeko lehen Korrika Batzordea, asteazkenean.
22. Korrika, Lezon, artxiboko irudian. 23. Korrika martxoaren 23ko 23:33an iritsiko da Lezora. Hala iragarri du gaur AEK-k, Korrikaren ibilbidearen aurkezpenean. Donibanetik iritsiko da herrira euskararen eta AEKren euskaltegien sostengurako martxa, eta oreretarrak lekukoaren zain izango dira tren geltokiaren inguruan ondoren: hori 23:48ak aldera izango da. Beraz, 2.700 kilometroko lasterketa ibiltari erraldoiak ordu laurden egingo du herrian. Gozamenerako hamabost minutu. Ahaztezinak.
Martxoaren 24an bukatuko da Baionan Harro herri lelotzat duen 23. Korrika, Irunen hasi eta hamar egun geroago. Bidasoko hiririk handienean martxoaren 14ko 16:00etan ekingo diote bideari, hasierako ekitaldiaren ondoren.
Beraz, bukatzear dela iritsiko da Korrika Lezora. Ibilbidearen ia kilometro den-denak eginak izango ditu ordurako. Baina Lezotik eta Oarsoaldetik jasoko duen bultzadak indarberrituko du euskaltzaleen topagune lasterkaria, Lapurdiko hiribururanzko bidea lausoago egiteko.
Oarsoaldera martxoaren 23ko 22:50ak inguruan iritsiko da Korrika, Antxora zehazki. Izan ere, Altzatik beherakoan, Buenavistan, jasoko du eskualdeak 23. Korrika, antxotarren lekukoekin. Barruti horri bira eman, eta Trintxerpe aldera joango dira lasterkariak, handik San Pedrora iristeko: motora hartu, eta Donibanerako jauzia egingo dute lekukoaren eramaileek. Donibane pasa, eta Lezoranzko bidea hartuko du lasterketak, herrira 23:33an iristeko; handik Errenteria-Oreretara joan (23:48), herri hori zeharkatu, eta Oiartzunerantz abiatuko da martxa hara 00:27 inguruan ailegatzeko Arraguara. Oiartzundik Nafarroa aldera egingo du Korrikak Lesakako bidetik, Aritxulegi zeharkatu eta herrialde horretara iritsiko da.
Korrika Batzordea
Korrikaren ibilbidearen xehetasunak jakinda, orain Lezon AEKren iniziatibari indarra emateko zer egin adostu behar da. Korrika iritsi aurretik egitekoak egikaritzeko mahaia Korrika Batzordea da: lehena hilaren 17an (asteazkena) egingo dute, 17:00etan Oroitzene AEK euskaltegian. Edonork parte har dezake, beraz, lezoarrei agertzeko deia egin diete.
