Mendi irteera antolatu du Itsastarrak Mendi Taldeak
Igande honetarako, hilak 14, jarri dute hitzordua, Herrerako Mendizaleekin batera. Bi ibilbide proposatu dituzte: luzea (20km) eta motzagoa (12km).
Trintxerpeko Itsastarrak Mendi Taldeak eta Herrerako Mendizaleek mendi irteera antolatu dute igande honetarako, hilak 14. Mendizaleak 07:30ean irtengo dira autobusez Trintxerpeko kaitik, eta Garberan ere jendea jasoko dute, 07:40ean. Irteerak 18 euroko prezioa du bazkideentzat eta 20 eurokoa bazkide ez direnentzat.
Mendizale taldeek bi ibilbide proposatu dituzte iganderako: luzea, 20 kilometrokoa, eta motzagoa, 12 kilometrokoa. Bi ibilbideetako taldeak batera hasiko dira Zumarragako Antigua ermitatik. 8. kilometroan, baina, geldialdia egingo dute Kizkitza ermitan, eta bertan ibilbide luzeko eta motzagoko taldeak bananduko dira. Luzekoek Ordiziara joko dute, eta motzagokoek, Ormaiztegira.
Ibilbide luzeak 20 kilometroko distantzia du. Zumarragako Antigua ermitatik abiatuko dira, eta Ordizian bukatuko dute irteera. Zazpi orduko ibilbidea aurreikusi dute antolatzaileek, geldialdiak barne. Hiru gain egingo dituzte: Beloki (659 metro), Kizkitza (676 metro) eta Murumendi (868 metro). Belokiko eta Murumendiko gainetara igotzea aukerakoa dela jakinarazi dute antolatzaileek.
Ibilbide motzagoari dagokionez, 12 kilometroko distantzia du. Zumarragako Antigua ermitatik abiatuko dira, eta Ormaiztegin bukatuko dute irteera. Bost orduko ibilbidea aurreikusi dute antolatzaileek, geldialdiak barne. Belokiko (659m) eta Kizkitzako (676m) gainetara igoko dira. Belokira igotzea, baina, aukerakoa izango da.
