Martxoaren 23ko gauerako plana egin du AEK-k: 23. Korrikaren partaide izatea
Berezia izango da oso Oarsoaldean martxoaren 23ko gaua. 23. Korrikak eskualdeko lau herriak zeharkatuko ditu.
Oarsoaldeko AEK-ko kideak, 23. Korrika eskualdean sartuko den puntuan, Buenavistan. Gaur aurkeztu du AEK-k 23. Korrikaren ibilbide zehatza. Jakina zen Irungo San Juan plazatik abiatuko dela martxoaren 14an, 16:00etan (aurretik hasierako ekitaldia egingo dute), eta gaurkoan azaldu dutena izan da euskararen eta euskaltegien sostengurako iniziatiba erraldoiak noiz eta nondik zeharkatuko dituen Euskal Herriko herriak, 2.700 kilometroko bidean. Oarsoaldera martxoaren 23ko gauean iritsiko da, zehazki, 22:50 inguruan sartuko da Antxora, Altzatik behera egin eta Buenavistan jasoko dute antxotarrek lekukoa. Han iragarri dute Oarsoaldeko AEK-ko kideek zein ibilbide egingo duen eskualdetik 23. Korrikak.
Ibilbideen berri zehatza izateko, jarraian herriz herrikako loturak:
Aurkezpenean azaldu dute otsailaren 1ean aktibatuko dutela kilometroak erosteko aroa. Baina hala ere, AEKren egitasmoa laguntzeko beste hainbat bide daudela jakinarazi dute.
Oarsoaldeko herrietan Korrikaren aurrekoak eta martxoaren 23koak prestatzeko, Korrika Batzordeak egingo dituzte lehenengoz lau herrietan. Honakoa da horien egutegia:
- Antxo. Hilaren 16an (asteartea), 17:45ean Txirrita AEK euskaltegian. Trintxerpen, San Pedron eta Donibanen ere bilkurak egingo dituztela aurreratu dute, baina hitzorduak oraindik zehazteke dituztela. Horien berri izan bezain laster jakinaraziko du HITZAk.
- Trintxerpe. Hilaren 25ean (osteguna) 20:00etan Terranova kaleko 3. lokalean.
- Lezo. Hilaren 17an (asteazkena), 17:00etan Oroitzene AEKn
- Errenteria-Orereta. Hilaren 18an (osteguna) 19:00etan Xenpelar AEKn.
- Oiartzun. Hilaren 19an (ostirala) 17:30ean Intxixu AEKn.
Korrika Kulturala
Korrikaren batera lotuta doa Korrika Kulturala. Lasterketa erraldoia babesteko eta girotzeko antolatzen den ekitaldien zerrenda da. Horren barruan egingo diten ekitaldi gehienak herrietako batzordeetatik adostuko diren arren, Oarsoaldeko AEK-k jada biren berri eman du. Hala, otsailaren 24an Korrikotea barrikoeta egingo dute Errenteria-Oreretan. Otsailaren 25ean, berriz, Badon opera jasoko du Oiartzungo Landetxek. Horien eta gainerakoen xehetasunak aurrerago emango ditu HITZAk.
