"Donazioak", eskerrak emateko erakusketa
Azken bi urtean Jantziaren Zentroaren esku jantziak utzi dituztenei eskerrak emateko antolatu dute erakusketa.
Donazioak erakusketa zabaldu du martxoaren 3ra arte Jantziaren Zentroak, dohaintzan azken bi urteetan jasotako jantzi eta objektuekin. Argazkia: Jantziaren Zentroa Larunbatean zabaldu zuen Jantziaren Zentroak erakusketa berria: Donazioak. Azken bi urtean hainbat familia eta norbanakok zentroari utzitako jantziekin ondu dute erakusketa hori, eta martxoaren 3ra arte bisitatzeko aukera izango da. Hamabi jantzirekin osatu du Jantziaren Zentroak erakusketa berria eta aitortu, gero eta gehiago direla jantzi eta objektuak ematen dizkioten lagunak.
Hamabi jantzi horiek, 120 urteko historia islatzen dute, 1850 eta 1970 urte artekoa, zehazki: “Gizonezko kapa bat, emakumezko gona, txanbra, zein berokiak ikus ditzakegu. Objektuei dagokienez, eguzkitakoak, eskularru luzeak, eta diru zorro bereziak ikus daitezke”.
Jantzi eta objektu gehienak Nafarroakoak dira: “Leitza, Bera eta Sesmako familien donazioak, Gipuzkoako hiriburuko emakumezko jantziak, eta Gasteizko arropa ere. Nazioartetik, Londres eta Alemaniatik iritsitako donazioak ere badira”.
Jantzi eta objektu bakoitzaren ondoan, zehatz jaso du informazioa Jantziaren Zentroak, urtea, jatorria, eta pertsona eta familia emailearen izena jarrita.
Informazioa biltzeari sekulako garrantzia ematen diote Jantziaren Zentroan, eta arduradunek zehaztu dutenez, dohaintza bat jasotzen duten unean, haren gaineko ahalik eta informazio gehien eta zehatzena biltzen saiatzen dira. Informazio hori, jasotako piezaren argazkia, eta duen kontserbazio egoeraren deskribapen zehatzarekin gordetzen dute. Ondoren, Jantziaren Zentroak emaileari ziurtagiria bidaltzen dio, jasotako ondarearen deskribapena eta haren zaintzarako konpromisoa hartuz.
Jasotako jantziek informazio andana ematen dutela esan dute Jantziaren Zentroko arduradunek: “Izan ere, argazkiek edo grabatuek irudi bat ikusten laguntzen digute, ehuna, botoiak, brodatuak, apaingarriak ikus ditzakegu. Jantzi bat janztea zer izan daitekeen ere irudikatu dezakegu. Baina barrualdeak, patroiak, jantzia osatzen duten piezek, puntadek, horik guztiek batzen dute, gordetzen dute, jantziaren benetako sekretua”.
Dohaintzarako deia
Jantziaren Zentroaren ondarearen parte izan daitekeen piezaren bat eduki, eta behar bezala gorde edo zaindu ezin ala nahi ez duten pertsona edo familiek, Jantziaren Zentroarekin harremanetan jar daitezkeela gogorarazi dute posta elektronikora mezua bidalita. Egin klik hemen.
Donazioak erakusketa doan bisitatu daiteke larunbatetan 11:00etatik 14:00etara eta 17:00etatik 20:00etara, eta jaiegunetan 11::00etatik 14:000etara.
