Hitzaldi sorta ondu du Gaztañoko auzo elkarteak
Zein baino zein interesgarriagoa den hitzaldi sorta antolatu du Gaztañoko Auzo elkarteak datorren hilabetean hasita. Otsailean, bi hitzordu izango dira, gainera.
Apaiz kartzela dokumentala emango dute Gaztañoko auzo lokalean otsailaren 2an. Zein baino zein interesgarriagoa den hitzaldi sorta antolatu du Gaztañoko Auzo elkarteak datorren hilabetean hasita. Orain arte hilabeteko hitzaldi bat antolatu izan dute, eta hori izango da dinamika aurten ere, baina otsailean bat beharrean, bi hitzaldi eskainiko dituzte.
Apaiz kartzela dokumentala emango dute Gaztañoko auzo lokalean otsailaren 2an, ostiralarekin.
Dokumentalak 1968etik 1976ra arte Zamorako apaizen kartzela izan zenaren gainekoa da eta bertan preso egon ziren lau apaiz presondegira itzuli dira ikus-entzunezkoa egiteko. Horietako batzuek hamar urtetik gorako zigorrak jaso zituzten frankismoaren errepresioa salatzen zuten sermoiak egiteagatik. Apaizentzako kartzela bakarra izan zen munduan Zamorako hori. 2021. urtean estreinatu zuten dokumentala Oier Aranzabal, David Pallares, eta Ritxi Lizartzak zuzendu dute.
Dokumentalaren zuzendarietako bat izango da emanaldiaren osteko solasaldian, baita kartzela horretan preso izan zen Xabier Amuriza bertsolaria ere arituko da.
Bigarren hitzaldia, Gaueko sorginen gainekoa, Joxetxo Otegi historiagile eta irakasleak gidatuta. II Mundu Gerran okupatutako herrialdeetako erresistentzia mugimenduetan borrokatu ziren emakumeak. Europa mendebaldeko eta Ameriketako Estatu Batuetako armadetan emakumeen parte hartzea garrantzitsua izan bazen ere, ez zuten horietan borrokan parte hartu. Emakumeak borrokatu ziren armada erregular bakarra Sobietar Batasuneko Armada Gorrian izan zen. Hortik abiatuta, xehe aztertuko du gaia Otegik.
Martxoan Ahoztar Zelaieta ikerketa kazetariak hartuko du lekukoa; eta apirilean, berriz, Xabier Susperregi idazleak Francis liburua aurkeztuko du. Azken bi horien zehaztasun gehiago aurrerago jakinaraziko dituzte antolatzaileek.
Hitzaldi guztiak, Gaztañoko auzo lokalean izango dira, 19:00etan hasita.
Ikastaroak
Gabonetako etenaldiaren ondoren, ikastaroak ere martxan jarri ditu jada Gaztañoko auzo elkarteak eta ekainera arte izango dira martxan orain arteko ordutegi eta egunetan. Astelehenetan Taiji Huang, astearteetan dantza afrikarren tailerra, asteazkenetan triki eta pandero tailerra, eta ostegunetan euskal dantzen tailerra izango da. Euskal dantza ikastaroa gainera, goizetan ere eskainiko dute aurrerantzean, astelehen eta ostegunetan 10:30etik 11:30era. Ostiral goizetan, berriz, josketa terapia tailerra egingo dute.
Gaztaño auzo elkarteak antolatutako hitzaldi eta jardueretan parte hartzera deitu du.
