Topaketa informalak egingo ditu Iratzerrik
Herrian energia berriztagarrien komunitatea sortzeko bidean aurrera urratsak egin nahi ditu Iratzerrik, lezoarrekin aurrez aurre bilduz.
Abenduan energia berriztagarrien komunitateen gaineko inkesta zabaldu zuen lezoarren artean Iratzerri klima larrialdiari eta energia krisiari aurre egiteko Lezoko taldeak. Hura arrakastatsua izan zela ikusita, eta gaiaren gainean interesa jende askok azaldu zuela jasota, taldekako topaguneak egitea pentsatu dute, gaian era informalean sakontzeko. Hala, Tiñelun, tragoska bat hartuz hitz egiteko hainbat data ezarri dituzte Iratzerrikoek, honakoak:
- Hilaren 22, 23 eta 24rako ezarri dute lehen txanda (datorren asteko astelehen, astearte eta asteazkenean)
- Hilaren 29, 30 eta 31rako ezarri dute bigarren txanda.
18:30 eta 20:30 artean gelditzea da asmoa. Egun horietan ezin, eta norbaitek taldekideekin biltzeko nahia balu, beste data bat proposatzeko aukera dago. Hala, ezarritako datekin bat egin eta txanda hartu nahi dutenek, edo berriren bat adostu nahi dutenek taldearen posta elektronikora idatzi behar dute bai konfirmazioetarako, edo hitzordu berria proposatzeko.
“Energia komunitateen gaia ez da erraza hitz gutxitan azaltzea. Denbora da Iratzerrin gaiari jarraipena egiten ari gatzaizkiola, eta hala ere galdera berrien erantzunen bila darraigu egunetik egunera. Lagunartean, ordubetez, potetxo bat hartuz, inkestaren inguruan hitz egingo genuke, besterik gabe”, esan dute taldekideek. Alta, jakinarazi dute inguruko herrietako energia komunitateen harreman estuak dituztela, hortaz, elkarbanatzeko informazio interesgarria dutela, “euren prozesuetatik ikasten ari gara”.
