Azken Ostirala dinamika abiatuko dute Sare eta Etxeratek elkarlanean
Hilean behin, euskal preso, iheslari eta deportatuen eskubideen alde egitea, salbuespen egoera amaitu eta lege arrunta aplikatu dadin eskatzea da iniziatibaren helburua.
Pasa den abenduaren 30ean euskal presoen alde Errenteria-Oreretan Sare Herritarrak antolatutako manifestazioaren irudi bat. Argazkia: @arkait_z Sare Herritarrak eta Etxerat Elkarteak elkarlanean Azken Ostirala antolatuko dute Errenteria-Oreretan hilaren 26tik aurrera. Hilean behin, euskal preso, iheslari eta deportatuen eskubideen alde egitea, salbuespen egoera amaitu eta lege arrunta aplikatu dadin eskatzea da iniziatibaren helburua.
Azken ostirala dinamika euskal presoen, iheslari eta deportatuen eskubideen aldeko dinamika da. Beharrezkoa. Izan ere, sakabanaketa politikarekin bukatzea lortu badute ere salbuespen neurriak ezartzen dizkiete oraindik orain euskal presoei, argi dio Sarek, “haien etxerako bidean ezinbestekoa da bertan behera uztea eta legedi arrunta ezartzea”. Hori da eskatzen duena Sarek.
Puntu honetara helduta, eskerrak eman behar dizkiela eragile eta herritarrei egindako ahalegina eta izandako parte hartzeagatik ere esan du Sarek, “horri esker lortu baita dispertsioarekin bukatzea. Hemen ditugu, baina etxean nahi ditugu. Hori izango da gure mezua eta gure irudia, Etxera!”.
Horretarako herrigintzan eta herrian dituen harremanetan sakontzen jarraituko du Sarek azken ostiraletan ere preso, errefuxiatu eta erbesteratuen etxeratzea indartzeko.
Salbuespen neurriak
Hiru salbuespen neurri ezartzen zaizkie oraindik ere euskal presoei dinamikak salatu duenez. “Lehena, 7/2003biziosorako espetxe zigorra da; bigarrena, 7/2014 Europan betetako zigorrak aintzat ez hartzea; bestetik, Jaurlaritzak eskumena hartu bai, baina oraindik Madrilek du azken erabakia eta txosten egokiak badira gradu aldaketa egiteko baina Madriletik helegitea aurkeztu eta gradu erregresioa ezartzen dizkiete. Hirugarren salbuespen neurria, horixe beraz, 5/2003 euskal presoen jurisdikzio kontrolean Madrilek duela azken hitza”.
Esker ona berriz ere dinamikarekin bat egin duten eragile, elkarte eta norbanakoei: “Behin eta berriro eskertu behar dugu egindako ahalegina, horri esker bukatu baita dispertsioa”. Baina hori ez dela nahikoa erantsi du, “Euskal Herriko espetxeetan dira, baina etxean nahi ditugu. Eskubide urraketa bat dago eta bada garaia ezartzeko legedi arrunta. Inork ez du eskatzen onurarik, indarrean den legedi arrunta ezartzea baino”. Horrenbestez, deia egin die herritarrei eta eragileei etxerako bide horretan bidaide izan daitezen. Lehen zita, hilaren 26an, 19:30ean Herriko Plazan.
