Literaturatik edaten txikitatik
0 eta 5 urte arteko haurrei begira literatur eskaintza ondu dute Lekuona Fabrikan.
Herriko txikientzat ere Lekuona Fabrika espazio segurua eta erreferentziala izan dadin eskaintza literario erakargarria ondu dute 0-5 urte artekoei begira. Ahozkotasuna, irakurzaletasuna eta liburuekiko maitasuna sustatzen, kalitatezko denbora partekatzea ahalbidetuko duten bi ekintza jarriko dira martxan: Liburu Baby Kluba eta Irakurketa Kluba.
Liburu Baby Kluba 0-3 urte arteko haurrei begirakoa da, jarduera ludiko eta didaktikoa da. Heldu batekin parte hartu behar dute haurrek, eta helburua txikitatik literaturarekiko, musikarekiko, artearekiko eta naturarekiko interesa piztea. Euskal kultura eta munduko kultura ezberdinak ere sustatzen ditu ekintzak. Saioak euskaraz izango dira, hilean behin, otsailetik ekainera arte. Lehena, otsailaren 8an izango da, 17:30ean, eta Mestiza elkarteak dinamizatuko du.
Irakurketa kluba, berriz, 3 eta 5 urte arteko haurrei begirakoa izango da. Ordubeteko sei saio egingo dituzte denera eta helburua da giro lasai batean irakurketaz gozatzea. Helduen trebatzea ere bilatzen du ekintzak, kontaketa moduen inguruko azalpenak emanda eta baliabideak helarazita. Haur literaturan aditua den Galtzagorri elkarteko Lur Kortak gidatuko ditu saioak. Haurraren laguntzaileak ozen irakurri beharko ditu umearekin batera aukeratutako ipuinak, eta saioak abestiz eta hitz joko dibertigarriekin aberastuko dituzte. Euskaraz izango dira saioak. Hilaren 23an izango da lehenengoa, eta hortik aurrera asteartero, 17:15ean hasita.
Batean zein bestean aritzeko ezinbestekoa da izena ematea. Lekuona Fabrikan egin daiteke izena ematea, 943 44 96 35 telefono zenbakira deituta edota 647 67 34 51 telefono zenbakira deituta. Posta elektronikoz ere eman daiteke izena. Horretarako, egin klik hemen.
