Txalaparta tailerrak emango dituzte Oarsoaldeko sei euskaltegietan
Ikastaro horiek Oreka TX txalaparta taldeko Harkaitz Martinez de San Vicentek emango ditu. Saioen helburua da gai erakargarri, berri eta gaurkotasunekoak euskaraz eskaintzea.
Oreka TX txalaparta taldeko Harkaitz Martinez de San Vicentek txalaparta tailerrak emango dizkie Oarsoaldeko sei euskaltegietako ikasleei.
Ikasturte bakoitzean sei gai jorratzen dira Oarsoaldeko Euskara Batzordearen Mintzagun egitasmoko tailerretan, eta gai bakoitzarekin ikastaro bana egiten da eskualdeko sei euskaltegietan. Saioek ordu eta erdiko iraupena izaten dute, eta haien helburua da “gai erakargarri, berri eta gaurkotasunekoak euskaraz eskaintzea”.
Hala, ikasle horien bizipenetan gai hori “lehen kolpean” beti euskaraz ageriko dela zehaztu dute antolatzaileek. Horrez gain, edozein gai euskaraz jorra daitekeela eta ikasleak ulertzeko gai direla ohartaraztea ere helburu nagusien artean daudela jakinarazi dute.
Hona hemen saioen ordutegiak:
- Errenteriako Udal Euskaltegia: Hilak 23, 16:00-17:30.
- Lezoko Oroitzene AEK: Hilak 24, 18:00-19:30.
- Oiartzungo Intxixu AEK: Hilak 25, 09:30-11:00.
- Errenteriako Xenpelar AEK: Hilak 25, 19:00-20:30.
- Pasai Antxoko Txirrita AEK: Hilak 30, 19:00-20:30.
- Pasaiako Udal Euskaltegia: Otsailak 1, 09:30-11:00.
