Hiru ikastetxe publikoek matrikulazio kanpaina aurkeztu dute
Otsailaren 7an abiatuko da matrikulazio kanpaina. Hezkuntza publikoaren aldeko hautua egiten dutenek, Bizarain Ikastola, Cristobal Gamon eta Koldo Mitxelena ikastetxeak izango dituzte aukeran.
Cruz, Jauregi, Sarasua eta Goikoetxea. Datorren ikasturterako matrikulazio kanpaina otsailaren 7tik 23ra arte izango da zabalik. Horren harira, Errenteria-Oreretako hiru ikastetxe publikoetako zuzendariek kanpaina aurkeztu dute gaur Itsaso Cruz Hezkuntza zinegotziarekin batera. Cristobal Gamon ikastetxeko zuzendari Aitor Sarasua, Bizarain Ikastolako zuzendari Ainara Goikoetxea, eta Koldo Mitxelena ikastetxeko Amaia Jauregik, hezkuntza publikoarena eskaintza euskaldun eta kalitatezkoa dela jarri dute nabarmen.
Herriko hiru ikastetxe publikoak babestu eta ezagutaraztea duela helburu udalak azaldu du Cruzek: “Oso harro gaude herri honetan dugun eskaintza publikoaz. Aniztasuna eta euskara oinarri duen kalitatezko eskaintza egiten dute Koldo Mitxelenak, Bizarainek eta Cristobal Gamonek”. Tokiko hezkuntza publikoaren gaineko harrotasuna adierazita, datorren hilabete hasieran martxan izango den matrikulazio kanpainaren gaineko zehaztasunak eman ditu hezkuntza zinegotziak.
Besteak beste, ate irekien jardunaldiei egin die erreferentzia. Izan ere, matrikulazio kanpainaren aurretik ikastetxeak bertatik bertara ezagutzeko aukera eskaintzen dute gurasoek zentro bakoitza eta egiten duen hezkuntza eskaintza xehe ezagutzeko aukera izan dezaten. Bizarain Ikastolak egin ditu jada saio horiek, baina interesa duten gurasoek ikastetxearekin harremanetan jarri eta hitzordua eska dezakete bertaratu eta zentroa ezagutzeko. Bizarain Txiki eraikinean egingo dituzte bisita horiek.
Cristobal Gamon ikastetxearen kasuan datorren astean izango dira ate irekien jardunaldiak, hilaren 23an 16:30ean eta 24an, 17:30ean. Aurkezpen bilera ere datorren astean egingo du Cristobal Gamon ikastetxeak: hilaren 26an, 16:30ean. Sorgintxulo 6 kaleko eraikin nagusiak izango dira denak.
Koldo Mitxelena ikastetxeak, berriz, Olibeteko eta Markolako eraikinetan egingo ditu ate irekiak, hilaren 31n, eta otsailaren 1ean; bi egunetan, 17:00etatik 18:30era.
Aurten ere herriko ikastetxe guztien informazioa jasotzen duen gutuna helarazi du udalak matrikulatzeko garaian diren eta Errenteria-Oreretan erroldatutako haurren etxeetara: “Udalak 413 gutun helarazi ditu guztira. Gure herriko hezkuntza eskaintza osoa jasotzen da bertan”. Beste arlo bati ere jarri dio azpimarra Cruzek gaurko agerraldian, garrantzia bizikoa dela iritzita, “matrikulatzeko garaian, kontuan hartu beharreko irizpideen artean dago hautatu beharreko hizkuntza eredua, eta udalak dei egin nahi die matrikulatzeko adienean dauden haurren familiei D ereduaren alde egin dezaten”.
Horrekin batera, Errenteria-Oreretako ikastetxeen aldeko hautua egiteko ere eskatu du, “haurraren gizarteratzean eta herriaren garapenean D eredua hautatzeak, eta Errenteriako ikastetxeetan matrikulatzeak duten garrantziaz jakitun da udala”.
Matrikula egiteko bi aukera daudela azaldu dute azkenik hiru ikastetxe publikoetako zuzendariek, online edo modu presentzialean. Azken aukera horren alde egiten duten gurasoei eskatu diete matrikula egiteko garaian hitzordua eskatu dezatela aurretik arreta egokia eta behar duten denbora eskaintzeko aukera bermatzeko.
Cristobal Gamon Ikastetxearen telefono zenbakia honakoa da, 943 89 91 38; Koldo Mitxelena ikastetxearena, 943 89 91 87; eta Bizarain Ikastolarena, 943 34 16 45.
