%7,6koa da Lezoko langabezia tasa
244 pertsona daude lanik gabe Lezon Oarsoaldea Garapen Agentziak jasota dituen datuen arabera: 141 emakume eta 103 gizon.
Oarsoaldea Garapen Agentziak bere webguneko Behatokia atalean jasota duenaren arabera, 2023ko abenduaren 31n Lezoko langabezia tasa %7,6koa zen. 244 pertsona zeuden lanik gabe, 141 emakume (%8,91ko tasa) eta 103 gizon (%6,42). 2022ko azken eguneko tasa %7,9koa zen (256 langabe), beraz, azken urtean apur bat jaitsi egin da tasa hori. 2012an, orduko krisiaren gordinenean, herriko langabeen zenbatekoa %15ekoa zen.
Oarsoaldeak jasota du 2023aren bukaeran 6.015 biztanle (3.038 emakume eta 2.977 gizon) zituela herriak (2022aren azken egunean baino lau gehiago), eta horietatik 2.839k Espainiako Gobernuaren Gizarte Segurantzaren Diruzaintza Orokorraren afiliatu zirela, hau da, lanarekin lortutako etekinen berri herritar horiek guztiek ematen zutela. Alta, horietatik %14,3 autonomoak direla du zehaztuta Oarsoaldeak.
