Ibon Taberna eta Julen Chiapuso, Txapeldun
Gipuzkoako Trinkete Txapelketako Lehen Mailako Eskuz Binakako txapelak etxera ekarri dituzte.
Taberna eta Chiapuso txapelarekin. Argazkia: Gipuzkoako Euskal Pilota Federazioa. Handiak dira. Ibon Tabernak eta Julen Chiapusok etxera ekarri dituzte Gipuzkoako Trinkete Txapelketako Lehen Mailako Eskuz Binakako txapelak. Irurako Trinketean ostiralean jokatutako finalean gehiago izan ziren EPLEkoak eta 40-29 utzi zuten markagailua partida oso gogor baten ostean.
Honakoak izan ziren partzialak: 8-1, 8-9, 27-24 eta 40-29. 27-24ra arte oso gogorra izan zen ordubete eta 22 minutu iraun zuen partida; EPLEko pilotariek, ordea, asmatu zuten erritmoari eusten. Biek ala biek txapelketa hobezina osatu dute.
Euskal Ligan hiru partida eta hirurak etxera, denak irabazi baitzituzten Donostiako Atano III.ean. Estefano eta Rubenek 35-18 garaitu zituzten Adurtzakoak, eta Pala Motzean Yorel eta Abelek 40-15 irabazi zuten. Eskuz Binakakoan, Etxezarretak eta Arangurenek 22-6 irabazi zuten Tolosako pilotarien aurka.
Emaitzei erreparatu baino ez dago, EPLEkoak sasoi betean direla baieztatzeko.
