Mendi bizikletan trebatzeko aukera OTXErekin
Oarsoaldeko Txirrindulari Eskolak mendi bizikleta saioa antolatu du hilaren 28rako, 2009 eta 2013 urteen artean jaiotako gazteentzako. Parte hartzaileak Karlos Saldise plazatik abiatuko dira, 10:00etan.
Igande honetan, hilak 28, mendi bizikleta saioa antolatu dute Oarsoaldeko Txirrindulari Eskolak (OTXE) eta Lezokoak Lezoko merkatari, ostalari eta zerbitzu elkarteak 2009 eta 2013 urteen artean jaiotako gazteentzako. Antolatzaileen esanetan mendi bizikleta proba antolatzearen helburuak dira bizikletaren erabilera sustatzea Lezon eta eskualdean, eta Oarsoaldea Txirrindulari Eskola eta Lezokoak Merkatari Elkartea ezagutaraztea. Lezoko Udalaren laguntza du jarduerak.
Parte hartzaileak 10:00etan abiatuko dira Karlos Saldise plazatik, bi taldetan banatuta. 2009 eta 2011 urteen artean jaiotako gazteek ibilbide luzea osatuko dute; horretan txirrindularitza klubetan ez dabiltzan gaztetxoek ere parte har dezakete. Guadaluperantz joko dute, 21 kilometroko bidea egiteko. 2012 eta 2013 urteetakoek, aldiz, ibilbide motza osatuko dute, 11 kilometrokoa. Iriartene ingururaino joan eta Jaizkibeletik itzuliko dira. 12:00ak aldera iritsiko dira Karlos Saldisera.
Ibilbidean zehar, JRG Norclamp mendi bizikleta taldeko txirrindulariez eta OTXEko monitoreez lagundurik joango dira parte hartzaileak. Proban aritzeko, gainera, kaskoa, kamara, bonba eta desmuntatzekoak eramatea derrigorrezkoa dela adierazi du OTXEk.
Izen-emateak 09:00etatik 10:00etara egin behar dira Karlos Saldisen, doan. Antolatzaileek jakinarazi dute asegurua egingo zaiela parte hartzaile guztiei. Horrez gain, txirrindulari gazteek Lezokoak Merkatari Elkarteak prestatutako hamaiketakoaz gozatuko dute probaren amaieran, Karlos Saldisen bertan. Photocall bat ere jarriko dutela aurreratu dute, lagun artean argazkiak atera ahal izateko.
Informazio gehiagorako, OTXEk webgunea eta helbide elektronikoa jarri ditu interesdunen eskura.
