Santa Agedari koplaka Ereintzarekin
Kopla eta bertsoak ez dira faltako Errenteria-Oreretako plaza eta tabernetan igandean, Santa Ageda bezperan.
Ereintzakoak koplaka iaz. Argazkia: Photo Poly Euskal Herriko hainbat herrietan antzera, kopla eta bertsorik ez da faltako Errenteria-Oreretan ere datorren igandean, Santa ageda bezperan. Ereintzak leial beteko du aurten ere kopla saioarekin. Taldeko kideak 17:45ean elkartuko dira Ereintza elkartearen egoitzan. Handik abiatuta, Desira tabernan egingo dute lehen geldialdia 18:20an saioa eskaintzeko. Ondoren, Xenpelar Bertso Eskolako kideekin batera, Elixabete Perez Gaztelu hizkuntzalari, ikertzaile eta irakasle errenteriarra omenduko dute Foru plazan 18:40an.
Madalenaren ermitara joko dute ondoren; bertan Madalenaren Lagunak elkartea izango dute kantagai koplariek(18:55ean), eta jarraian, Leku Zaharra tabernak harrera egingo die 19:15ean. Mikelazulon egingo dute hurrengo geldialdia eta saioa, hori Oarso urtekariari eskainia (19:35ean). Kerala taberna (19:50), Donosti Sagardotegia (20:10) eta Maite taberna (20:30) ere izango dituzte agertoki Ereintza taldekoek.
Azken saioa, Herriko Plazan egingo dute, 20:50ean Xenpelar Bertso Eskolako kideekin batera Landarbaso abesbatzari zorion agurra eta esker ona eskaintzeko.
Koplari gisa Amaia Agirre ariko da eta musikarekin berriz, Doike taldea eta Ereintzaren txistulariak, guztiak Xabier Vesgaren zuzendaritzapean. Berariazko bertsoak, berriz, Julian Albisturrek, Sabin Irastorzak eta Mikel Ugaldek idatziak dira antolatzaileek jakinarazi dutenez.
Ereintzatik nabarmendu dute talde irekia dela koplaka ibiliko dena kalez kale eta tabernaz taberna, eta beraz, parte hartu nahi duen orok izango duela aritzeko aukera, “beti ere ohiko janzkerak errespetatuta”. Herritarrei gonbita egin die gainera Ereintzak, omenaldi xumeak egingo diren eremuetara joan daitezen.
