100 konpromiso, "hobea izango den Pasaia" eraikitzeko
Datozen lau urteetan iparrorratza izango den Agintaldi Plana aurkeztu zuten atzo publikoki. 100 neurriak "egingarriak eta neurgarriak" izango dira.
Udal gobernuko kide guztiak, atzoko saioaren bukaeran. Pasaitarrek lepo beteta utzi zuten atzo arratsaldean Donibaneko Juanba Berasategi aretoa, jakin-mina piztu baitzuen udal gobernu berriaren deialdiak. Pasaiako udal gobernuak 2023-2027 ekitaldirako osatu duen Agintaldi Plana aurkeztu zuen. Oholtzan, Teo Alberro alkatearekin, udal gobernuko zinegotzi guztiak izan ziren: EH Bilduko Iraitz Pazos, Miguel Mari Torrea, Mikel Garcia, Aintzane Taberna, Laura Re, Aitor Brion eta Natitxu Etxarri eta Podemoseko Julen Rodriguez.
Datozen lau urteetarako iparrorratza izango dena aldizkari moduko batean jaso zuten bertaratutako guztiek, eta datorren astelehenean pasaitar guztiek euren etxeetan plana osaturik jasoko dutela aurreratu zuten. 100 neurriz osatutako dokumentua partekatu zuten atzo udal ordezkariek, arloz-arlo identifikatutakoak. “Ariketa sakona” egin dutela adierazi zuen alkateak, “plan dinamikoa” osatu dutela. “Ordu eta indar handia inbertitu behar izan dugu lan honetan. Sinistuta gaude orain egindako ahaleginak aurrera begirako lana erraztuko digula, barrura nahiz kanpora begira. Elkarlana baita gobernu honen lan egiteko ezaugarrietako bat. Elkarlana eta gardentasuna, horrela elkarrekin, garena egingo dugu. 100 neurri hauetaz gain, gai gehiagori ere helduko diogu, behar berriak sortuko direlako eta herritarren eta eragileen ekarpenak jasotzen jarraituko dugulako”.
Izan ere, plana neurgarria izango da, atzoko saioan alkateak konpromiso hartu zuen “neurrien nondik norakoez eta planaren beraren betetze mailaz maiztasun zehatz batez herritarrak informatzeko”, gardentasuna ezinbestekoa baita udal gobernuarentzat, eta gainera, “herritarren eskubidea delako”. Finean, San Pedron, Trintxerpen, Antxon eta Donibanen “etorkizun laburrean hobeto bizitzeko aukera emango diguten neurriak” jaso dituzte, eta ondorioz, “herritarrentzat hobea izango den udalerria” eraikiko dutela hitz eman zuen. “Gertuagoa, osasungarriagoa, euskaldunagoa, parte hartzaileagoa, feministagoa, justuagoa, imaginatiboagoa, eraldatzaileagoa, garbiagoa eta kohesionatutakoa” izango den Pasaia lortzeko lanean ariko dira.
Neurriei dagokionez, denetik jaso dute: estrategikoak, handiak, txikiak… Denak, baina,”egingarriak” direla adierazi zuten udal ordezkariek. Etxebizitza, hirigintza, herri zerbitzuak, gizarte zerbitzuak, berdintasuna, tokiko merkataritza, euskara, kultura, gazteria, kirola eta mugikortasuna eta trantsizio ekologikoa, udal langileak, Udaltzaingoa eta Pasaiako ondarea. Atal horietan banatu dituzte aipatutako 100 neurri horiek.
Pasaia batera garena izena jarri diote planari, eta diseinatu duten irudia ere aurkeztu zuten publikoki atzo. “Hemen atzean ikusten duzuen euskarri honek adierazten du zer garen, zer egingo dugun eta nola egingo dugun. Herritarren iritziak, ekarpenak, zalantzak eta galderak jaso eta erantzuteko bitartekariak jarriko ditugu. Udalerri hau grisetik kolore argitara pasatu dadin”, esan zuen azkenik Alberrok.
Plan osoa kontsultatzeko, klikatu hemen.
