Altzibarko etxebizitza tasatuetan izena emateko epea martxoaren 1ean irekiko da
Bina logelako bost etxe, hiruna gelako beste sei eta egokitutako beste bat eraikiko dituzte Aduriz eta Agerrealde artean. Izena emateko epea, hilabete eta erdi.
Altzibarko etxebizitza berriak joango diren lursaila, horiz markatuta. Atzoko plenoan onartu zuten Agerrealde eta Aduriz artean egingo dituzten hamabi etxebizitza tasatuetan izena emateko oinarriak.
Hamabi etxe izango dira: bina logelako 5 etxe (70 m2 ingurukoak); hiruna gelako sei (87 m2-koak); eta izaera iraunkorreko desgaitasuna duten pertsonentzat egokitutako bat. Garajea eta trastelekua izango dute denek.
Udalak jakinarazi duenez, hiru logelako etxebizitzetan 4 pertsona edo gehiagoko bizikidetza unitateek izango dute lehentasuna.
Etxebizitza horietako bat eskuratzeko interesa dutenek martxoaren 1etik apirilaren 15era eman beharko dute izena, udaletxean bertan edo erregistro elektroniko bidez.
Bakarka edo elkarrekin bizi diren edo biziko diren bi pertsona edo gehiagoz osatutako bizikidetza unitateetan egin daiteke eskaera, gogorarazi dutenez. Udal etxebizitza tasatuen erregistroan aurretik izena emana dudenek ere eskaera aurkeztu beharko dute, etxebizitza hauen zozketan parte hartu nahi badute.
Baldintzak
- Adina: Adinez nagusia edo adingabe emantzipatua izatea.
- Errolda: 2024ko urtarrilaren 1etik Oiartzunen erroldatuta egotea, azken hamabost urteetan bost urtez erroldatuta egon izana edo azken hamar urteetan herrian etenik gabe lan egin izana. Errolda baldintza betetzen dutenek lehentasuna izango dute lan baldintza betetzen dutenekiko. Genero indarkeriaren biktima izan diren emakumeei ez zaie erroldatuta egotea eskatuko.
- Baldintza ekonomikoak: Bizikidetza-unitateak 15.000 euro eta 50.000 euro bitarteko diru-sarrera haztatuak (ponderatuak) izatea.
- Ondarea: Etxebizitzarik ez izatea (salbuespenak egongo dira, etxebizitza edukita ere bizikidetza-unitatearen beharretarako egokia ez izatea edo banaketa kasuetan, besteak beste).
Oinarri guztiak Oiartzungo Udalaren webguneko Iragarki Taulan aurki daitezke.
Zozketak
Behin aurkezteko epea bukatuta, baldintzak betetzen dituztenekin zerrenda egin eta zozketa bidez esleituko dituzte etxebizitzak. Zozketa notario aurrean egingo dutela eta publikoa izango dela iragarri dute. Onartutako eskaeren zerrenda argitaratzean zehaztuko da eguna eta ordua; hala ere ekainean egingo dela aurreikusten du udalak.
Izaera iraunkorreko desgaitasuna duten pertsonentzat egokitutako etxebizitza zozketatuko da lehenengo. Gainontzeko 11k bizikidetza-unitatearen kide kopuruaren eta etxebizitzaren logela kopuruaren arteko “egokitasuna” kontuan hartuz esleituko dira.
Bi zozketa egingo dituzte horretarako. Hiru gelako etxebizitzena izango da lehenengo zozketa, aukeraketa hori egin duten lau kide edo gehiagoko unitateen artean. Zozketa hori bukatutakoan, bi logelako etxebizitzak zozketatuko dituzte gainontzeko eskatzaileen artean.
Gainera, hiru gelako etxebizitzen zozketan baten bat esleitu gabe geldituko balitz, azken zozketa bat egingo lukete.
