"Denbora, esfortzu eta lan gehiago" inberti dezala eskatu dio PSE-EEk Teo Alberro alkateari
Salatu dute EH Bildu eta Podemos taldeen udal gobernuak "ADIFen edota portuaren aurrerapenen inguruko galderak saihestu" zitutela astearteko bilkuran.
Pasaiako PSE-EE taldeak ohar bat kaleratu du, astearteko plenoaren gaineko iritzia emateko. Salatu dute EH Bilduk eta Podemos taldeen udal gobernuak “ADIFen edota portuaren aurrerapenen inguruko galderak saihestu” zituela astearteko bilkuran. Adierazi dute “larriki paralizatuta jarraitzen duten gaiak” daudela oraindik landu eta egiteke. Luzuriagako eraikineko bulegoez, portuko espazioaren lagapenaz edo Antxoko tren geltokiko proiektuaren erredakzioaz galdetu zuten astearteko plenoan sozialistek.
“Alkatea asko arduratzen da muntai bisualekin egindako proiektuak aurkezteaz, baina zalantza dugu atentzio berbera jartzen ote dion proiektu horiek egi bihurtu daitezen. Nola esplikatuko du herritarren aurrean Luzuriaga eraikinerako galdutako dirua? Ez bada iratzartzen, proiektuaren benetako etorkizunak arduratzen gaitu”, esan dute.
Portuarekin negoziatzeko premiaz aritu dira sozialistak ere, eta gai honetan “aurrerapen falta” leporatu diote alkateari. Sozialisten arabera, Ziriza Etxearen eta Bizkaia Plazaren lagapenak Espainiako Gobernuaren oniritzia dute jada eta hortaz, Teo Alberro alkateari eskatu diote Portuko agintaritza presionatu dezala Donibane eraikinaren lagapenaz hitz egiteko, PSE-EEren arabera, portuaren jabetzara pasa daitekeelako eraikina. “Gerta daiteke hemendik bost edo sei urtera, portuari baimena eskatu behar izatea udaletxeak ordaindutako instalakuntza batzuk erabiltzeagatik”.
Antxoko tren geltoki berriaren proiektuaren erredakzioaz ere aritu ziren astearteko bilkuran. Herritarrek azken urteetan egindako aldarrikapenekin bat egin arren, ADIFEkin izandako bileretan alkateak antxotarren kexak helarazi ote zituen zalantza dute sozialistek. “Badirudi orain hori ez dela hain garrantzitsua EH Bildurentzako. Ezberdintasun bakarra da, orain gobernuan dagoela, eta aurrea hartu behar dutenez, ez zaiela hain interesgarria iruditzen”.
Azkenik, argazkiak eta muntaiak alde batera utzi eta “denbora, esfortzu eta lan gehiago dedikatu dezala” eskatu diote Alberrori, “Pasaia ez dadin dike lehor batean egon”.
