Haurtzaroko ikasleak, Beskoitzeko ikastolaren alde
Pasa den asteburuan diru-bilketa egin zuten plazan, baita sentiberatzeko gutunak idatzi ere. Gabonetan bildutako dirua ere hara bideratu dute.
LH2ko ikasleak plazara igo ziren, Beskoitzeko arazoaren berri eman eta dirua biltzera. Haurtzaro Ikastolak jakinarazi duenez, Beskoitzeko (Lapurdi) ikastola laguntzeko kanpaina betean sartuta daude ikasleak. Izan ere, hango herriko etxeak ikastola lurrak erabiltzeko baimenik gabe utzi zuen abenduan.
“Lapurdiko 51 umeren euskaraz ikasteko oztopoaren gaia gelan agertu orduko, ekintzailetza eta eskuzabaltasun handia agertu zuten LH2. mailako haurrek”, adierazi du ikastolak. Modu horretan, Done Eztebe plazara igo ziren, eltzeitsuak eskuetan, Beskoitzeko ikastolarentzako sos batzuk biltzera.
Gutun batzuk idatzi zituzten lehenago, herritarrak sentsibilizatzeko asmoarekin. “Haiek, egin zezaketenetik, keinua egin nahi zieten euskaraz beraiek bezainbeste eskubide dituzten beste umeei”, gaineratu du Haurtzarok.
Diru-bilketa
Pasa den asteburukoa ez zen elkartasun-keinu bakarra izan. Gabonetan kantuan atera zireneko txanpon eta billeteak Beskoitzera bideratu zituzten.
“Gauzak horrela”, jarraitu dute, “beste behin ere elkartasun handiarekin jokatuz, 1.284 euro bidali dituzte, hango ikastolako umeek euskararen eta euskal kulturaren balioa lur berrian ereiten jarraitzeko”.
