German Ugarte kaleari izena aldatzea onartu du plenoak
Urteko lehenengo plenoa egin dute. Hamasei gai jorratu dituzte, gehienak urte hasierari dagozkionak. Kalearen izen aldaketa aho batezkoa izan da.
Oiartzungo udalbatzak urteko lehenengo plenoa egin zuen atzo (asteazkena, urtarrilak 31). Hamabost puntukoa zen gai-zerrenda, azken uneko gehiketa batekin.
Altzibarren hamabi etxebizitza eraikitzeko esleipen-oinarriak onartu zituzten lehenik eta behin. Aduriz sagardotegia zenaren eta Agerrealde etxadiaren artean etxebizitzak egiteko proiektua dago.
Ondoren, hezkuntzarekin lotutako bi puntu etorri ziren, bata bestearen atzetik. Urmendiri 873.000 euroko ekarpena egingo zaio, bi aldeek duten hitzarmenarekin jarraituz. Haurtzaro Ikastolak, bere aldetik, 412.000 euro pasatxo jasoko ditu mantenu-lanetarako.
Kale izen berria
Udalak aho batez onartu zuen Ugaldetxo auzoko German Ugarte kaleari izena aldatzea. XVI. mendeko inkisidore izan zen, Oiartzungo bikario izateaz gain.
Joana Mendiburu alkateak nabarmendu zuenez, Ugaldetxoko bizilagunen eskaria izan da izena aldatzearena. EH Bilduk eta EAJk aho batez onartu zuten izen berria: Mendibil kalea. Udalak erakundeei —Espainiako Estatistika Institutua, Gipuzkoako ogasuna, Correos…— jakinarazi behar die izen aldaketarena, baina, “bereziki”, bertan bizi direnei.
Beste gaiak
Aurtengo kontratazio plana onartu zuten, eta 23 kontratazio izango direla jakinarazi zuten. Iazkoaren berri ere eman zuten, baita 2024ko diruzaintza-planaren berri ere, beste hainbat gairen artean.
Udalak beste erakundeetan dituen ordezkariak izendatu zituzten, bi erakundetan, zehazki. Agustin Lekuona izango da Elizalde Institutuan ordezkari. Bestea (gai-zerrendatik kanpo zegoen) da Ibintza Iragorri eta Jon Albisu Aiako Harria Parke Naturaleko Patronatuan sartzea.
