Aldundia: "Indarkeria sexistarik gabeko kaleak, auzoak eta udalerriak nahi ditugu"
Joan den astean izandako eraso matxistari aurre egiteko elkarretaratzean izango dira aldundiko ordezkariak. 19:30ean da mobilizazioa, plazan.
Gipuzkoako Foru Aldundiak, herriko eragileek eta Lezoko Udalak egin bezala, joan den astean Lezon izandako eraso matxista salatu du. “Indarkeria sexistarik gabeko kaleak, auzoak, udalerriak eta hiriak nahi ditugu”. Hala, gaurko 19:30ean Gurutze Santuaren plazan egitekoa den elkarretaratzera ordezkaritza bidaliko du foru erakundeak, zehazki, Nerea Isasi Berdintasuneko foru zuzendaria izango da bertan.
Eraso matxisten jatorria “gizonen eta emakumeen arteko berdintasun falta” dela adierazi du aldundiak, “emakumeak mendean eta kontrolpean izatea nahi duten jarrera eta ideia matxistak”. Hala, bortxa kasu horiei erantzun publikoa eman behar zaiela ziur da, eta horrela jasota dagoela Gipuzkoako Protokolo Instituzionalean. Emakumeen eta gizonen arteko berdintasunaren aldeko aldarria egin du aldundiak, bai eta “pertsonaren duintasuna, sexu-askatasuna eta osotasun fisikoa” errespetatzekoa ere. “Eskubide bortxaezinak dira; eskubide horien aurka egiten duten jokabideek ez dute lekurik gure gizartean. Emakume guztiek dute aisialdiaz eta gizarte-harremanez askatasun osoz gozatzeko eskubidea”.
Era berean, Foru Aldundiak bere gertutasuna eta elkartasuna adierazi dizkie biktimari, bai eta haren senide eta hurbilekoei ere.
