Arkaleko barrakoia inauguratuko dute hilaren 17an
'Trabajadoreen' barrakoien erreplika eraiki dute , Kattin Txikik eta udalak. Omenaldian parte hartzera gonbidatu dituzte oiartzuarrak.
Kattin Txiki memoria historikoa lantzen duen elkarteak eta Oiartzungo Udalak elkarlanean sortu dute trabajadoreen barrakoi baten erreplika. Arkalen dago, preso esklaboen kanpalekuetako bat zegoen inguruan. Errepidean bidexka bat hartu behar da bertara joateko.
Kattin Txiki eta udalaren asmoa da trabajadore izan zirenek aitortza txoko bat izatea. 1939an ekarri zituzten lehenengoak, eta 1942ra arte eduki zituzten preso esklaboak. Dokumentazioen arabera, erregimen frankista jaioberriak 12.500 trabajadore eraman zituen behartuta Oiartzunera, hemezortzi batailoietan banatuta.
Barrakoiak luze-luzeak zirenez, eraikitakoa erreplika zati bat besterik ez da. Hala ere, nahikoa bertako bizimodua nolakoa zen irudikatzeko. Barrakoiaren inguruan panel informatiboak jarriko dituzte, gainera.
Hilaren 17an —datorren asteko larunbata— inauguratuko dute barrakoiaren erreplika. 12:00etan izango da, eta udalak oiartzuarrak gonbidatu ditu omenaldian parte har dezaten.
