Stockholmeko 20 ikasle Albaolan ariko dira astebetez
Albaolako Nazioarteko Ontzigintza Eskolako "aprendizak" izango dira astebetez. Itsas lanbidea ikasteko aukera izango dute egonaldi honetan.
Albaolako ontzigintza eskolako ikasleak lanean. Aste honetan Stockholm (Suedia) hiriko Skeppsholmes Folkhoskola eskolako 20 bat ikasle Pasaiara heltzear dira, Albaola Itsas Kultur Faktorian astebeteko egonaldia egingo dute. Honetan, ontzien mantentze lanetan, eraikuntzan eta egur kudeaketan arituko dira, besteak beste. Gaur dira heltzekoak, eta astebetez luzatuko dute egonaldia. “Bi ontzigintza eskolen arteko lankidetza honi esker, itsas historia aberatsa duten bi herrien arteko elkartrukearen lekuko izango gara”, diote Albaolako iturriek.
2021ean eskola honetako presidente Anette Clefberg eta zuzendari Eva Ripa Torstenson Pasaian izan ziren, Aprendiztegi eskolaren barruan, eta faktoriako iturrien arabera, egonaldi “aberasgarri horren fruitua” da ikasleek egingo dutena.
2017an abiatu zuen Albaolak Aprendiztegi Nazioarteko Ontzigintza Eskola. Ordutik, mundu osoko ikasleek ia galduta zegoen itsas lanbidea ikasteko aukera izan dute Pasaia. Egitasmoa “belaunaldi berriei zurezko ontzigintza transmititzeko helburuarekin” sortu zuten. Batetik, hiru urteko formakuntza integrala eskaintzen du eskolak, eta bestetik, tamaina handiko ontziak eraikitzen ikasteko (San Juan baleontzia, esaterako) aukera ematen diete.
