16. atariko bizilagunek etxetik kanpo pasa behar izan dute gaua
Teo Alberro alkateak jakinarazi du "prebentzio" neurri bezala hartu duela erabakia udal arkitektoak. Sotoa egoera nahiko kaskarrean geratu dela azaldu dute udaleko iturriek.
13:15ak aldera piztu zen sutea. Antxoko Nafarroa hiribideko 16. atariko bizilagunek etxetik kanpo pasa dute gaurko gaua, hala jakin berri du HITZAk. Udaleko iturriena arabera, atzo iluntzean hartu zuten erabakia udal arkitektoek, hala jakinarazi zuen Teo Alberro alkateak, iluntzean: “Hasiera batean prebentzio modura kaltetuta zegoen biga bat apuntalatu egin dute eta espero dugu bihar balorazio zehatz bat egitea familiak beraien etxeetara ahalik eta azkarren buelta daitezen”. Gaur goizean dira biltzekoak.
Bada, kaltetutako bizilagun gehienek euren senide eta lagunen etxeetan pasa dute gaua, baina hiru familiek bestelako alojamendua behar izan dute, aldundiak eskaini diena.
Antza denez, sotoa egoera nahiko kaskarrean geratu da, baita solairuartekoa, baina goiko solairuak onik daudela diote udaleko iturriek.
Teo Alberro alkatea, Mikel Garcia alkateordea eta Iraitz Pazos Hirigintza zinegotzia bizilagunekin batera izan ziren egun osoan zehar. Denek gaua non pasatu jakin arte haiekin izan ziren, iluntzean hartu baitzuen erabakia udal arkitektoak.
Zenbait bizilagun artatu behar izan zituzten atzo anbulantziek, eta horietako bi eri etxera eraman behar izan zituzten, kea arnasteagatik. Zorionez, haien egoera ez da larria, atzo bertan beste bizilagunekin eta udaleko ordezkariekin itzuli baitziren.
Sutearen jatorriari dagokionez, ez dago inolako konfirmaziorik oraindik.
13:15ak aldera piztu zen sutea, 16. atariaren ondoan dagoen lokal batean, aspalditik jarduerarik ez duena.
