Oso biziduna da Donibane
Inauterietako larunbata oso biziduna izan zen Donibanen. Marrazki bizidunen gaiari umorez eta imajinazioz eutsi zioten sanjuandarrek.
Umorea, kolorea eta giro ezin hobea. Halakoa izan zen inauterietako larunbata Donibanen. Gaia bazuten sanjuandarrek, marrazki bizidunena. Horri jarraiki, eta guztietako animazio pertsonaiak ekarri zituzten herrira, haur, heldu eta adineko. Imajinazioa bor-bor Pasaiako barrutiko kale zaharretan. Euria egin zuen. Baina hori ez zen oztopo izan inauteri giro biziduna kalera eramateko.
Izan ere, goizean eta arratsaldean desfileak egin zituzten herritik sanjuandar animatuek. Oso biziduna da Donibane. Eguerdiko bazkarian indarrak berreskuratu zituzten, eta Meipiko karpako otorduan den-denak bildu ziren benetakoa zen janaria dastatzera. Arratsaldeko desfilearen ondoren mozorro lehiaketaren txanda iritsi zen. Epaimahaiak lan latza izan zuen onena aukeratzeko.
Jarraian, Eduardo Laboa sanjuandarrak HITZAra bidalitako argazki sorta.
