Bizilekua bota nahi diete
Herrera kaleko bizilagunek eta Oarsoaldeko Etxebizitza Sindikatuko kideek agerraldia egin dute gaur, Eskalerillaseko eraikina ez dezatela bota aldarrikatzeko.
Bizilagunak eta Oarsoaldeko Etxebizitza Sindikatuko kideak, agerraldian. Duela astebete esan zieten euren etxebizitzetatik atera behar dutela. Lau hilabeteko epea dutela horretarako. Trintxerpeko Herrera kaleko bizilagunak dira, Eskalerillas ondoan dauden blokean bizi direnak, alegia. 60 urte baino gehiago daramate han bizitzen. Horren arrazoia, Eusko Trenbide Sareak (ETS) Pasaiako Porturako trenbide besoa egin nahi duela, zamen garraiorako izango den trenbidea. Etxebizitza horrez gain, Kaiko Herrera eremuko hainbat pabiloi ere izango dira afektatuak trenbide berria medio. Horiek eraitsi behar dituzte, bota. “Bizilagun batzuei miseriazko kalte-ordain eskas bat eskaini diete. Beste askori kale gorria”.
Egoeraren berri emateko agerraldia egin dute gaur arratsaldean Herrera kaleko 10-11 sotoetako bizilagunek eta Oarsoaldeko Etxebizitza Sindikatuko kideek eraikinaren atarian. Bizilagunen izenean Javi Perez hizlari, sindikatuaren eledun Martin Bautista. Han bizi direnen artean dezente dira adinekoak. Familiak dira. Hamasei etxebizitza daude blokean, eta hamabitan familiak bizi dira: bost etxejabeak dira, besteak ez. Gaiaz protesta egiteko banderolak indarrez eutsi dituzte agerraldian, oso kezkatuta, baina irmo. Bizilagunek, agerraldia hasi baino lehen, prentsari esan diote asko eskertzen dutela Oarsoaldeko Etxebizitza Sindikatuaren laguntza.
ETS eta Pasaiako Portu Agintaritzak “inolako bizitoki alternatibarik eman gabe etxegabetu” nahi dituztela salatu dute: “Duela 60 urte baino gehiagotik gure bizileku den bloke hau bota, eta merkantzien garraiorako trenbide bat egin nahi dute. Gure senideak portuko langile zirelako iritsi ziren 1960ko hamarkadan bloke honetara. Ordutik, jabetza portuarena izan arren, beti arduratu izan gara bloke honetaz, baita konponketa gastu guztietaz ere”. Azaldu dute portuak hitzemana ziela bizilagunei etxebizitza horiek erosteko aukera izango zutela. Baina ez da hala izan.
Badira urte batzuk bertako bizilagunek jakin zutela portuak biziberritzerako plana egin zuela. Tartean zen zama gaietarako trenbidearen proiektua, 7 milioiko aurrekontukoa. “Baina denbora tarte luze honetan ez dugu portuaren partetik inolako komunikaziorik jaso. Zurrumurruak besterik ez. Duela egun batzuk jaso genuen portuaren lehen mezua”. Lau hilabete eman dizkie portuak etxebizitzak hustu eta joateko. Pertsonarik gabe, eraistea libre. “Obra honi esker, betiko enpresari handiek aberasten jarraituko dute. Instituzioek ezikusiarena egiten segituko dute. Eta guk etxebizitzak galduko ditugu”, nabarmendu dute. “Horregatik portuari zein ETSri eskatzen diegu Eskalerillaseko etxegabetzea gelditzeko eta arduraz jokatzeko. Era berean etxegabetze guztien etetea aldarrikatzen, eta antolatzen jarraituko dugu”.
Gaurkoan gaiaren berri emateko bildu dira bizilagunak era sindikatuko kideak. Aurreragorako, ordea, mobilizazio eta ekintza gehiago iragarri dituzte.
